Нилъеда лъалеб жо буго къиямасеб къо чIезегIан ракьалда лъикI­лъи­ги квешлъиги, рохелги пашманлъиги, зулмуги хIалимлъиги, хъахI­лъиги чIегIерлъиги букIине бугеблъи. Гьеб буго хиси гьечIеб нух ва инсанасе Аллагьас ихтияр кьун буго бокьараб тIаса бищизе, гьелда рекъараб жаза гьабизе къотIиги гьабун. Амма бажарулищха кинавго чиясухъа лъикIабщинаб гьабулаго гIумру тIамизе, рекIелъ бугеб квешлъиялъул гъветI, кьолболъаги бахъун, нахъе рехизе?

Доб букIана ракьалда инсан вижараб заман. Цинги ккана кIудияб такъсир, гIодобе тIуна тIоцебесеб би. Адамил лъималазул цояс цогидав чIвана гьесдехун бугеб жахIда-хIусудалъе гIоло. Гьелдаса нахъе ракьалда хутIана гьев кIиясулго нух. Къабилица Гьабил чIвалаго, Гьабилица абурал рагIаби, къиямасеб къо чIезегIан Аллагьасукьа хIинкъулезе мисаллъунги хутIана. Къуръаналда буго (Гьабилица абулеб): «Дуца дун чIвазе квер битIаниги, дица данде битIизе гьечIо, дун халкъ бижарав Аллагьасукьа хIинкъула», - ян. Амма кинавго чиясдайищха кIолеб, Гьабилидаса мисалги босун, «дуца дун какизе, чорокаб рагIи абизе дурго мацI биччаниги, дица дирго мацI биччазе гьечIо мун какизе»; «дуца дида кьабизелъун зар борханиги, дица борхизе гьечIо»; «дуца машина бачунаго дие квалквал гьабуниги, дица гьабизе гьечIо данде квалквал»; «дуца зулму гьабуниги, дица гьабизе гьечIо», - ян абизе. КъанагIатазда гурони кIолищ Гьабилил нух кквезе?

Жакъа бокьарав чиясда гьикъани, щай дуца пуланав чиясде чорокаб рагIи абурабилан, гьес жаваб кьола тIоцебе дос абидал, данде жаваб гьабунин абун. Щай дуца кьабурабин гьикъидал, цин дос кьабидал кьабгIанин абула. ХIакъикъаталдайин абуни, гьеб Гьабилил нух гуро. Зулмучи тезе ккола хвалица кквезегIан. БетIергьанас гьесде тIаде дагьавги кIудияв залим тIамизегIан. Китаялъулазул аби буго: «Дурго тушманги живго тун, гIурул рагIалда сабруялда мун чIани, дуда бихьизе буго гьесул жаназа гIуруца босун бачIунеб», - ан.

Залимасе квешлъи гьабизе ургъулаго, нилъеца гIадада риччала багьа тIадегIанал минутал. Сабуралда тасбихI гьабизе рес бугеб заман хвезабула, гьединасе гьабизесеб заралалда тIад ургъулаго. Нилъеда бичIчIуларо пуланасе къор гъезеян ургъулаго араб щибаб лахIзат мунго дуцаго гьалаг гьавиялде тIамулеб гали букIин.

Абу Гьурайратица бицун буго: «Цо нухалда гIалхул гIарабияв семизе лъугьана Абубакар-асхIабиде, Бичасул аварагги аскIов вукIаго. Гьесул семи рагIарав авараг гьимулев вукIана. Цинги гьев цIакъго ццим бахъун семизе лъугьиндал, Абубакарица данде жаваб гьабизе байбихьана. Гьеб мехалда авараг, тIадеги вахъун, нахъе ана. Авараг индал, гьесда хадувго Абубакарги ана. Цинги гьес абула: «Я, Расулуллагь, гьадав чи диде хьандолелъул мун гIодов чIун вукIана, дица жаваб гьабизе лъугьиндал, мун нахъе ана», - ян. Аварагас абула: «Дов чи кIалъалеб мехалда дуда аскIов вукIана малаик, гьесие жаваб гьабулев. Мун гьесде данде кIалъазе лъугьиндал, гьенибе бачIана шайтIан. Дун шайтIан бугелъув вукIунаро», - ян.

Абубакар кинав чи вукIаравали бицине ккелищха. Гьединлъидал, пикру гьабеха, гьединав чияс кинаб жавабдай гьабун батилеб дов гIарабиясе? Чорокаб рагIийищ абун батилеб яги гъибат, бугьтан, мацIищ гьабун батилеб? Гуро, гьес гIицIго цо-цо рагIабазе жаваб кьуна. Гьанжеги халгьабе, гьеб бакIалдасацин малаикги лъутун, шайтIан бачIунеб мехалъ, нилъеда аскIове малаикго къаладай? Гьединлъидал, тушманас хвалчен бахъидал, нилъеца данде берцинаб тIегь бахъизе ккола. Нилъее заралалъе ургъулаго тушманас сордо борчIулеб мехалда, нилъеца сордо рогьине ккола гьесие дугIа гьабулаго, Аллагьас гьесул ракI лъикIлъизабеян гьарулаго. Аллагьас нилъ ахIулел ругелъулха хIеренлъиялде, тIаса лъугьиналде.

Нилъеда гIемерлъун вихьизе бегьуларо азарго гьудулцин, гьединго дагьавлъунги вихьизе бегьуларо цо тушманцин. Абураб цо рагIиялъ нилъеца нилъего я гьудул, яги тушман валагьула.

КIочоне бегьуларо гьитIинаб кIкIараялъул хIанчIиялъ, гъалбацIалъ хIанчIиялдасаги кIудияб зарал гьабизе рес букIин ва гьитIинабго гIункIкIалъ гьарулел кIудиял заралал. Инсанасул гIумру кутакалда къокъаб жо буго, гьесие рекъоларо гьеб заман рецIел босиялда тIад хвезабиялде биччазе.

ШайтIаналъ инсанасул рекIелъе рехула хIалимав чи - къадарав, тIаса лъугьунев - гIодовегIанав чи вугин абурал пикраби. Гьелде ахIула нилъ шайтIаналъ ва шайтIаналда нахърилълъарал гIадамаз. Амма ТIадегIанав Аллагьасги хирияв аварагасги нилъ ахIула хIеренлъиялде, тамахлъиялде, тIаса лъугьиналде, рецIел босунгутIиялде.

Щив вугониги дандчIвайдал, воре, кIочене тоге кIиго пиша гьабизе. ТIоцебесеб, гьимизе, кIиабилеб, салам кьезе. Цинги гьаб ракьалда нилъер хьвади букIина Гьабилил гIадинаб.