ГIабдурашидил «Топ- 5» ва Тираналъул ургуялда магIарулазул гуч
Дагьал церегIан къоязда Албаниялъул тахшагьар Тираналда рагIалде бахъана эркенаб гугариялъул рахъалъ Европаялъул чемпионат. 24-26 апрелалда гьениб лъугьа-бахъунелде буссун букIана спорталде интерес бугевщинав чиясул кIварги, берги, пикрабиги. Дагъистаналдаса анкьго гугарухъанас гIахьаллъи гьабуна турниралда, ва анкьасго лъикIаб хIасилги бихьизабуна.
Щуго меседил, цо гIарцул ва цо мазгарул шапакъатгун нахъруссана гIолохъаби рокъоре. Россиялъул командаялъе щвараб ичIго медалалда гьоркьоса анкьгояб босана нилъер республикаялъул гугарухъабаз.
Гугари ва гьелда сверухъ лъугьунебщинаб кIудияб лъугьа-бахъинлъун кколарин абуни, мекъи букIинаро. ТIоцебесеб нухалъ гуро нилъер гIолохъаби континенталъулаб чемпионаталда чемпионаллъун рахъунел ругел. Амма кин букIаниги, Дагъистаналъул речIчIухъабаз Европаялъул тIаса рищарал гугарухъабазда гъорлъ бергьун кIудияб хIасил бихьизабураб мехалъ, ракI бохичIого хутIуларо.
ТIадехун абухъе, бищунго къуватал, цересел къецазда тIоцересел бакIал росарал спортсменал ун рукIана республикаялдаса гьеб турниралде:
57 кг — Муса Мехтиханов, 61 кг — Заур Угуев, 65 кг — Башир МухIамадов, 70 кг — Давид Баев, 74 кг — Тимур Бижоев, 79 кг — АхIмад ГIусманов, 86 кг — Ибрагьим Къадиев, 92 кг — Аманула ХIажимухIамадов, 97 кг — ГIабдурашид Садулаев, 125 кг — Шамил Мусаев.
«Дун хекко тIагIине вачIарав гьечIо»
Турниралъул тIоцебесеб къоялъ ургуялде рахъана Муса Мехтихановги, Башир МухIамадовги, АхIмад ГIусмановги ва командаялъул цевехъан ГIабдурашид Садулаевги.
2020 соналдаса нахъе, чанцIулго нухда цебе хIетIе ккун ва визабазул гизма хIан, санкциязул багьанаби рачун, ГIабдурашид махIрум гьавун вукIана гьел къецаздаса. Анлъго соналъ гьесие рес щвечIо Европаялъул чемпионаталда жиндирго рагIи абизе, гьале ахирги исана тIокIлъигун бергьун цевехун ана. Бащдаб финалалда гьесде данде вукIана ракьцояв АхIмад МухIамаев. 11:1 хIисабгун гьесдасаги бергьун финалалде ворчIана.
Нахъисеб къоялъ букIана чанго соналъ гьесие гьукъун букIараб финал. Гьесда данде вукIана Словакиялъул легионер, асатIинав Батырбек Цакулов.
14:3 хIисабгун гьесда тIад тIокIлъиги босун, анлъабилеб нухалъги Европаялъул чемпионлъун вахъана ГIабдурашид Садулаев.
Гьебго къоялъ жеги кIигоги меседил шапакъат босана нилъер речIчIухъабаз. Чемпионаллъун рахъана 65 кг цIайиялда Башир МухIамадов ва 79 цIайиялда — АхIмад ГIусманов. КIиялго гьел ккола ЦIумада районалдаса.
ТIисси росулъа АхIмад ГIусмановасда финалалдаги данде вукIана ракьцояв, районцояв — Хуштадаса легионер МухIамадхIабиб КъадимухIамадов. Гьале чанго сон буго гьесул Белоруссиялъул командаялъе гIоло цевевахъунелдаса.
Бигьаяб букIинчIо гьеб финал. КIиго магIарулав вукIана ургуялда къеркьолев. Цонигиясе бокьун букIинчIо бергьенлъи кодаса биччазе. Амма икъбал ккана АхIмад ГIусмановасе ва ункъабилеб нухалдаги Европаялъул чемпионасул цIарги босун пьедесталалде вахана гьев.
125 кг цIайиялда Шамил Мусаевасе битIккечIо, бащдаб финалалда туркас бахъана гьесул бергьенлъи ва шапакъат щвечIого хутIана Дагъистаналъул атлет.
57 кг цIайиялъул вакил Муса Мехтихановасдеги кIудияб хьул букIун батиялда щаклъи гьечIо тренеразул. Амма ракьцояв, магIарулазул легионер Ислам Базаргановасе гьимана икъбал ва месед ана Азербайжаналде.
Гьединаб букIана турниралъул тIоцебесеб къо. Гьебго къоялъ финалалде рорчIана 61 ва 86 кг цIайиялъул церехъаби Заур Угуев ва Ибрагьим Къадиев. Финалал тIоритIана нахъисеб къоялъ.
Олимпиадаялъулгун Европаялъул чемпион Заур Угуевасе гьел къецал тIоцереселлъун рукIинчIо. Амма Дагъистаналъул гьунар бугев цIияв речIчIухъан Ибрагьим Къадиев тIоцебесеб нухалъ ворчIана континенталъул къецазул финалалде ва бергьенлъи кодоса биччачIо — гьес къезавуна Азербайжаналъул спортсмен Арсений Джиоев.
Заур Угуевасда данде финалалде ккана ракьцояв, Армениялъул легионер Залимхан Абакаров. КIиабилебги Европаялъул чемпионасул шапакъат дандиясе биччачIо Заурицаги.
