Салам, хIурматиял магIарулал, «ХIакъикъат» газеталъул гьудулзаби, авар мацIалъул учительзаби, рахьдал мацI бокьулел лъимал ва чIахIиял!

Цоги нухалда баркула нужеда тIаде щвараб цIияб сонги. Баркат-рахIмат гIемераб батаги. ГIемерлъаги нилъеда гьоркьор магIарул мацIги, тарихги, адабиятги бокьулел магIарулал. Гьайгьай, нужер кумекалдалъун газеталъул гIадатлъун лъугьун буго санайил «ЧIагояб классика» фестиваль-конкурс тIобитIи. Исанасеб фестиваль сайгъат гьабизе буго магIарул прозаялъе, ай хабариял асаразе.

Кидаго гIадин, гьенир гIахьал­лъи­зе бегьула учитель­забиги, цIал­до­хъабиги, гьезул эбел-эменги ва цогидалги. Къец тIобитIизе буго, гIахьалчагIазул соназда рекъон, чанго батIияб бутIаялда:

1) Ясли-ахазул лъимал

2) Байбихьул классазул цIалдо­хъа­би

3) 5-8 классазул цIалдохъаби

4) 9-11 классазул цалдохъаби

5) Учительзаби

6) ХутIарал чIахIиялги.

Фестиваль-конкурсалъул аслияб мурадлъун ккола гIисиназулги чIахIиязулги авар прозаялде рокьи бижизаби, миллияб адабияталъул тарихги цоги нухалда ракIалде щвезаби, хъвадарухъабаз нилъее тарал хIикматал асаразул гъасда гьоболлъи бай, хадусел гIелазе гьеб бечедаб хазина цIуни. ГIенеккарал паналъиледухъ хабариял асарал рикIкIун бажари — гьеб буго кIудияб махщел. Арал соназда, гIахьалчагIи ругьунлъизегIан, толеб букIана кучIдул рикIкIинеги. Амма кучIдузул конкурсал цIакъ­го гIемер кколел руго. Гьенир гIа­хьаллъулезул къадарги соналдаса со­налде цIи­кIкIунеб буго. Гьединлъидал ра­кIал­де ккана гIицIго прозаялъул фес­тиваль тIобитIизе. Конкурсалда тIасан суалалги гIе­ме­рал рукIунелъул, гьанирги гьарулел руго номинациял:

1) МагIарул хъвадарухъанасул асаралдаса

2) Дагъистаналъул хъвадарухъабазул асараздаса (магIарул мацIалде руссинарурал. Нужецагоги руссинаризе бегьула)

3) ГIурус адабияталъул прозаял­даса (нужецагоги руссинаризе бегьула авар мацIалде)

4) ГIахьалчиясул асаралдаса (ну­жецагоги хъвазе бегьула бокьараб темаялда)

Исанасеб сон улкаялъул президентас Россиялъул халкъазул цолъиялъул ЛъагIеллъун лъазабун бугелъул, нилъецаги авар прозаялъул исанасеб фестиваль сайгъат гьабулеб буго Халкъазул цолъиялъул лъагIелалъе.

Нужерго хIалтIаби, ай магIарул мацIалда проза рекIехъе цIалулеб видео (цо-лъабго минут) битIизе бегьула 20 марталде щвезегIан. Фестивалалда гIахьаллъизе, Ма­хIач­хъалаялде рачIине руго видео нижехъе битIарал киналго гIа­хьалчагIи. Гьеб тIобитIизе буго Расул ХIамзатовасул цIаралда бугеб миллияб библиотекаялда 25 марталда, ай цIалдохъабазеги учительзабазеги тадбиралда гIахьаллъизе санагIалъи бугеб заманалда, КIалбиччанкъоялъул байрамги ну­харегIун, ихдалил каникулазул ахиралда. Гьеб ккола арбагI къо.

Гьединго букIине буго хасаб­ но­минация. Ш. Хъазанбиевалъухъе ва МухIамад Манаповасухъе ритIарал хIалтIаби ритIизе бегьула газеталъул те­­леграм-канал бачуней ПатIимат СултIанмухIамадовалъухъеги. Кана­лалъул подписчиказ кьезе руго гьар­кьал. Щварал гьаркьазда рекъон кье­зе руго бакIалги.

Гьаниб гьадин мухIканго хъван бугониги, цо-цоял кIалъанги ра­чIу­на кучIдул бегьуларищилан абун. Гьаб нухалда гIицIго прозая­лъе кьезе буго къимат. Амма цо-цо гIа­хьалчагIазул хIалтIаби рукIуна «Гьоболасул хIама хIортIе бачанин. Гьекъаниги гьекъечIониги, ургъел гьечIин» абураб гIадалги. Гьединал хIалтIаби рикIкIинеги гьечIо. Гьадинабго цIаралда гъоркь гIурус мацIалда тIобитIулеб конкурсги берцин бихьун, гьабулеб конкурс буго гьаб. Бокьилаан интернеталда­са халгьабизе, гIурус мацIалда цIал­дохъабаз асарал рикIкIунеб къа­гIидаялъулъги. Гьединаб кIудияб гьари буго цIалдохъаби хIадурулел учительзабаздеги.

БакIалги кьезе руго, церего гIадин, жюриялъул членаз кьурал баллазда рекъон.

а) 60 баллалде щвезегIан — лъаб­абилел бакIал.

б) 61- 80 балл- кIиабилел бакIал.

в) 81-100 балл — тIоцересел бакIал.

Жюриялъе цIакъго асар гьабураб щуго хIалтIи мустахIикълъизе буго Гран-приялъеги.

Рехсолел руго цо-цо авторазул цIаралги, нужеца жидер асарал, конкурсалде хIадурулаго, хIалтIизаризе бегьулел:

— Расул ХIамзатов, Фазу ГIалие­ва, Муса МухIамадов, ГIарип Расулов, МухIамад ГIабдулхIалимов, Гъа­зи­му­хIамад ГъалбацIов, Му­хIа­мад Шамхалов, Ражаб Дин­му­­хIамаев, Асадула МухIамаев, Па­тIимат Мур­тазагIалиева, Му­хIа­мад Сулиманов, Багъатар ХIа­жиев, ХIусен ХIажиев ва цогидалги.

Бокьарав шагIирасулги рукIуна хабариял асарал. Масала, руго гьел ТубхIат Зургьаловалъул, ГIайшат Малачиевалъул, МухIамад Хириясулаевасул, ХIасан ХIабибовасул ва цогидазулги. Ясли-ахазул ва байбихьул классазул лъималазе гIадал асарал рукIуна «Лачен» журналалдаги «ХIакъикъат» газеталъул «БурутI» гьумералдаги.

ХIалтIаби ритIизе бегьула гьал адресазде, кIалъазе бегьула гьал номеразде:

1) Шамай Хъазанбиева — 8-963-413-82-99; samay.kazanbieva@mail.ru

2) ПатIимат СултIанмухIама­д­о­ва, (телеграм-каналалъе) — 8-988-436-51-45; yasaypatimat@mail.ru

3) МухIамад Манапов — 8-988-665-41-83; magomed.manapov2001@mail.ru

Адабгун «ХIакъикъат» газеталъул редакция.

Шамай Хъазанбиева