Тарихалъул цIиял цIалул тIахьал
27 октябралда «Дагъистан» РИАялда тIобитIараб пресс-конференциялда бицана тарихалъулгун обществознаниялъул цIиял цIалул тIахьазулги Россиялъул рагъулабгун тарихияб жамгIияталъулги (РВИО) ва ИСТОРИЯ.РФ абураб интернет-порталалъулги хIакъалъулъ. Республикаялъул СМИязул журналисталгун дандчIвана РВИОялъул Дагъистаналда бугеб регионалияб отделениялъул председатель Энрик Муслимовги Дагъистаналъул лъай кьей цебетIезабиялъул институталъул проректор АхIмад Къурбановги.
Тарихалъул ва обществознаниялъул цIалул тIахьазда хиса-басиял гьаризе байбихьана 2024 соналда. Гьелъие кьучIлъун босана 2024 соналъул микьабилеб февралалда РФялъул президентас гъулбасараб ва улкаялъул пачалихъияб политикаялъул аслу тасдикъ гьабулеб указ. Гьеб указалда цебелъун букIана лъабго масъала: цогоял цIалул тIахьал хIадури, тарихалъул дарсал кьеялъул цогояб методика гIуцIи ва тарихиял лъугьа-бахъиназул хIакъалъулъ мухIканал баянал кьолел каналал рагьи. Гьел масъалаби тIуразариялъул мурадгун гIуцIун букIана Владимир Мединскиясда нухмалъи тIадкъараб ведомствабазда гьоркьосеб хасаб комиссияги.
«ЦIиял цIалул тIахьал хIадуриялъул аслияб мурад буго чIванкъотIарал ва мухIканал баянал кьей. СССР биххун хадуб тарихиял хIужаби щивас баян гьарулел рукIана жиндие бокьухъе. Тарихалъул цIиял цIалул тIахьал руго нилъер суверенитеталъул кьучIги тарихияб лъай кьеялъул мугъчIвалеб хIубиги», - ян абуна пресс-конференциялда Энрик Муслимовас.
Э. Муслимовас бицана 26-29 ноябралда Дагъистаналда тIобитIизе бугеб конференциялъул хIакъалъулъги. Гьелда гIахьаллъизе вуго анлъазаргоялдаса цIикIкIун чи.
АхIмад Къурбановас бичIчIизабуна тарихалъул цIалул тIахьазул цIалдохъабазеги учительзабазеги бугеб санагIалъи. Бицана гьес, цо стандарталда рекъонкколел цIалул тIахьал гьечIолъиялъ, ЕГЭялъул тIадкъаязе жавабал кьолаго, гIемерал гъалатIал кколел рукIиналъул хIакъалъулъги.
ЦIиял цIалул тIахьал хIадуриялъулъ гIахьаллъана РАНалъул ДФИЦалъул Тарихалъулгун археологиялъул ва этнографиялъул гIалимзабиги ДГУялъулги ДГПУялъулги махщелчагIиги. Гьезул электронниял вариантал лъун руго ДИРОялъул сайталда.
Адам Рамазанов, ДГУ, ЖОялъул 3 курсалъул студент