UFCялъул лъабго рачелги, «Манчестер Юнайтедалда» МестIерухъа ГIамирил цIарги, Айзанатил бергьенлъиги

UFCялда дагъистаниязул чарамул хатI

Исанасеб сон ракIалда чIана UFCялъул речIчIухъанлъиялда жаниб Ислам МахIачевас босараб кIиго бергьенлъиялдалъун: лъагIалил байбихьуда, 18 январалда, Бразилиялдаса Ренато Мойканодасаги бергьун, гьес цIунана тIадагьаб цIайиялда UFCялъул чемпионасул рачел.

14 маялда гьев ана цогидаб цIа­йия­лъул макъамалде ва, 15 нояб­ралда Австралиялдаса Джек Делла Мадалленадасаги бергьун, цIияб ра­челги цIунун, тарихалде ана. Гьев бер­гьана 28 нухалъ ва къуна гIицIго цо нухалъ.

Исана ичIабилеб марталдаги бу­кIана нилъер миллаталъе къима­таб бергьенлъи. Гьеб къоялъ Лас-Вегас шагьаралда Бразилиялдаса ре­чIчIухъан Алекс Перейрадасаги бергьун, чемпионасул рачел щун букIана Шамил районалъул ТIелекьа МухIамад Анкалаевасеги.

 

ГIабдулрашид ва цогидал

Эркенаб гугариялъул рахъалъ бищун ракIалда чIанин абизе бегьула июналъул ахиралда Москваялда тIобитIараб Россиялъул чемпионат: 10 шапакъаталда гьоркьоса ичIгояб босана нилъер гIолохъабаз. ИчIго дагъистанияв вахана пьедесталалъул бищун тIасияб хIокIиде. Щугоясе насиблъана гIарцул ва анкьгоясе мазгарул шапакъатал.

Дагъистаналъул спорталъул тарихалда гьединаб халатаб меседил чIел нилъер гугарухъабаз босараб хIужа ракIалда гьечIо. Гьанир гьел киназулго цIарал хъвачIониги, цохIо цIар рехсон тела: 97 кг ц1айиялъул вакил, «Танк» ГIабдулрашид Садулаевас цоги нухалъ бихьизабуна жиндирго гьунар ва, анкьабилеб нухалъги Россиялъул чемпионлъунги вахъун, спорталъул тарихалде ана иргадулаб бергьенлъигун.

Боксалъул рахъалъ ракIалда чIана 16 декабралда Германиялда букIараб дунялалъул чемпионаталъул къецал. Гьенив лъабго нилъер ракьцояс босана бергьенлъи. ЛъаратIа райо­налъул НитIиццухъа Муслим ХIажимухIамадовасги цIияб цIар хъвана боксалъул тарихалда, лъабго нухалъ дунялалъул чемпионлъунги вахъун.

Англиялъул премьер-лигаялда магIарулав

Исанасеб соналъул тIокIлъилъун рехсезе бегьила цоги къиматаб хIужа. Апрелалъул авалалда нилъер ракьцояв, гьунар бугев футболист ГIамир Ибрагьимовас профессионалияб контракт хъвана Англиялъул машгьураб «Манчестер Юнайтед» клубгун.

ГIамирил умумул ккола ГIахьвахъ районалъул МестIерухъ росулъа. Англиялде гочиналде цере гьесул эбел-эмен гIумру гьабун рукIана Буйнакск шагьаралда. Жеги гьитIинав чи ГIамир вукIаго, ана гьел гIумру гьабизе Великобританиялде. Ква­тIичIого ГIамир кьуна футболалъул школалде, ва жеги гьитIинго гьес жиндирго букIинесеб гьунар загьир гьабуна гьениб. 15 сон бачIев чи гьев восана «Манчестер Юнайтед» клубалъул санаде рахинчIел футболистал хIалеб командаялде ва, гIемер заман балелде, гьесул хIаялъ асир гьаруна киналго. Ва кватIичIого гьесде пикру буссана «Манчестер Юнайтедалъул» аслияб клубалъул.

Щиб лъалеб, Криштиану Роналду ва Леонель Месси гIадал цIар ра­гIарал футболистазе гIадаб машгьурлъи щвезе бегьула ГIамириеги. Криштиану Роналдул профессионалияб карьераги байбихьидалха гьебго «Манчестер Юнайтед» клубалдаса.

 

Халкъазул спартакиада

21 сентябралда МахIачхъалаялда рагьана Дагъистаналъул Халкъазул спартакиада. Тахшагьаралъул «Труд» стадионалде вачIун вукIана гIе­мерав чи. Республикаялъул 16 райо­налдасагун шагьараздаса командабаз гIахьаллъи гьабуна гьеб тадбиралда.

Спартакиада рагьана батIи-ба­тIи­яб заманалда Олимпиялъулал хIа­язда чIел босарал ва гьенир шапа­къатал щварал нилъер машгьурал спортсменаз.

Парадалда гIахьаллъана: МухIа­мадхан ГIарацилов, Сажид Сажидов, ХIайдарбег ХIайдарбегов, Сайпула Абсаидов, МухIамадхIасан Абушев, НурмухIамад Шанава­зов, МахIач МуртазагIалиев, Ша­рип Шарипов, МухIамад Ибрагьимов, Ширвани Мурадов, Зем­фира Му­хIамадгIалиева, ГIабдусамад ХIа­дисов ва гIемерал цогидалги — дунялалъул, Европаялъул ва Олимпиадаялъул чемпионал, призерал.

Нилъер республикаялда тIоцебе­себ нухалъ тIобитIулеб гьеб бергьун кIудияб спортивияб тадбиралъ хIакъикъаталдаги гIемерав чи данде гьавуна.

Хунзахъа Айзанатица кIудияб спорт квегъулеб буго

ЛъагIалил хIасилал гьарулаго, цо­ги цIияб хабар лъана. Нилъер ракьцояй, Хунахъа Айзанат Муртазаевалъ гьал къоязда бергьенлъи босана фехтованиялъул рахъалъ Россиялъул Кубокалъе гIоло къецазда. КIиго нухалъ тIатIала Россиялъул Кубокалъул чемпионлъун яхъарай гIадан ккола гьанже Айзанат. Россиялъул фехтованиялъул спорталъул тарихалда жаний гьей ккана тIатIалаго гьединал къецазда бергьарай ункъабилей спорт­сменкалъун. Гьелде щвезегIан гьединабго бергьенлъи босун букIана Мария Мазиналъ, Анна Сивковалъ ва Татьяна Гудковалъ.

Исана июналда Италиялъул Генуе шагьаралда Айзанат Муртазаева яхъана фехтованиялъул рахъалъ Европаялъул чемпионлъунги. 2019 соналдаса нахъе гьел къецазда нилъер пачалихъалъе бергьенлъи насиблъун букIинчIо, гьединлъидал Айзанатие щвараб меседил шапакъат цIакъго къиматаб кканин абизе бегьула.

Гьединго июлалъул ахиралда Гру­зиялъул тахшагьар Тбилисиялда тIо­битIараб дунялалъул чемпионаталда командаялъулал къецазда Айзанатие щвана гIарцул шапакъат.

Гьединал хIасилалгун нухаре­гIу­леб буго Айзанатица 2025 сон. Гьарула гьелъие тIаде щолеб 2026 соналъги цIиял бергьенлъаби, сундулъго икъбал ва гьединго Олимпиялъулал хIаязда бергьенлъи щвараб къоги жакъа гIадин гIагарлъун бихьизе.

 

Силдиб — UFCялъул чемпионазе кьучI лъолеб къебелъул рукъ

Исана ЦIумада районалъул Сил­ди росулъ хIалтIизе биччана ГIаб­дулманап НурмухIамадовасул цIа­рал­да бараб спортивияб комплексги. Гьеб ккола ГIабдулманапил вас, UFCялъул машгьурав речIчIухъан ХIабиб НурмухIамадовас Конор Мак­грегорида тIад бергьенлъи босун щвараб гонораралъул гIарцухъ бараб кIудияб спорталъул кIалгIа. Ралъдал гьумералдаса 1880 метралъул борхалъуда мугIрул тIогьиб бугеб росу ккола ЦIумада районалъул Силди.

Спорткомплекс базе букIиналъул хIакъалъулъ ХIабибица бицун бу­кIана 2018 соналдаго. Гьебго соналъ, эмен ГIабдулманап чIаго ву­кIаго, гьелъие кьучIги лъун букIана. Ва гьале анкьго соналдасан гьесул инсул росулъ бан бахъана киналго хIажаталщинал шартIаздалъун хьезабураб спорткомплекс.

Спорткомплекс базе байбихьарал тIоцересел соназго абулеб букIана UFCялъул турниралда цере сборал гьенирги тIоритIизе ругин абун. Дунялалдаго машгьураб ва гьабсагIат бищун ссиялда бугеб, спортивияб гIу­цIиялъул къецазда цересел ругьунлъаби Дагъистаналъул бищун рикIкIада, мугIрул росулъ тIоритIизе рукIин абураб хабаралъго батIияб нур кьолеб буго гьелъие.

ЛъагIалил хIасилал гьаруна Ашахан Юсуповас