Рахьдал мацӀазде кӀвар буссинабуна
Гьал къоязда ДРялъул хӀукуматалъул председателасул ишал тӀуралев МухӀамад Рамазановас къабул гьабуна дагъистаниял рохизарулеб кӀиго хӀукму.
ТӀоцебе абуни, республикаялъул бюджеталъул нахъраталил бутӀаялдаса 15 миллион гъурущ кьезе буго Дагъистаналъул халкъазул мацӀазда ругел текстазулги аудиохъвай-хъвагӀаязулги тарихазулаб библиотека гӀуцӀизе.
Гьеб хӀалтӀи тӀубазабизе тӀаде босун буго ДРялъул Цифраялъулаб цебетӀеялъул, информациялъул ва печаталъул министерствоялъ. Гьеб мурадалда тӀадкъай кьун буго ГӀалибег Тахо-Годил цӀаралда бугеб Дагъистаналъул педагогикаялъул гӀелмиял цӀех-рехазул институталъе. Гьелъул хӀалтӀухъабаз гӀуцӀун руго щибаб мацӀалъул таржамаби гьарулел хӀалтӀул къокъаби. ГьабсагӀаталда магӀарул, дарги, лъарагӀ, лезги, тат ва табасаран мацӀазде буссинабун буго 50 азарго предложение. Гьединго гьабулеб буго рахьдал мацӀалда текстал цӀалиялъул хӀалтӀиги. Гьелдаса пайда босизе буго рехсарал мацӀазда хӀалтӀулел интернеталъул техникиял платформаби хӀадуриялъе.
Рехсараб хӀалтӀул хӀасилалда ДРялъул Цифраялъулаб, информациялъул ва печаталъул министерствоялъ хӀадуризе буго пачалихъиялги муниципалиялги хъулухъал рахьдал мацӀазда тӀуралеб цогояб портал.
КӀиабилеб лъикӀаб хабар - республикаялъул муниципалитетазда рахьдал мацӀазде цӀикӀкӀараб кӀвар кьолел школал рагьизе руго.
Гьелъул хӀакъалъулъ бицана 26 октябралда ДРялъул хӀукуматалъ тӀобитӀараб данделъиялда. Гьениб цебелъун букӀана 2026 соналда тӀобитӀараб пачалихъияб аттестациялъул хӀасилазул суал. ДРялъул лъай кьеялъул ва гӀелмуялъул министрасул ишал тӀуралев ЯхӀя Бучаевас данделъиялда абуна ичӀго класс лъугӀарал цӀалдохъабазе исана рес кьун букӀанила рахьдал мацӀалъул ва адабияталъул ОГЭ кьезе, амма цониги чияс гьелъул экзамен тӀаса бищичӀилан.
МухӀамад Рамазановас лъазабуна гьелъие ккарал гӀиллабазул цӀех-рех гьабеян ва тӀаде жубана: «Цо чанго муниципалитеталда ралагье рахьдал мацӀалде цӀикӀкӀараб кӀвар кьезе рес бугел школал. ХӀисабалде росе рахьдал мацӀалъул дарсал кьеялъул рахъалъ церетӀурал школал ва гьенир гӀуцӀе бищун лъикӀал къагӀидаби хӀалтӀизариялъул, рагьарал дарсал кьеялъул ва вебинарал тӀоритӀиялъул тадбирал», - ан.
Гьел школал лъугьине ккола бищун лъикӀал методикаби хӀалтӀизарулеллъун ва гьезул пайдаяб хӀалбихьи тӀибитӀизабизе буго цогидал школазул учительзабазда гьоркьоб. Гьединал школал рагьиялъул аслияб мурад буго рахьдал мацӀазде цӀалдохъабазулъ рокьи куцай ва Дагъистаналъул халкъазул мацӀал цӀуни.
Дагьалъ цебе Дагъистаналъул бетӀер Федор Щукиницаги лъазабуна 37 лъималазул ахалда рахьдал мацӀазул кьучӀалда гьитӀичазе тарбия кьезе бугилан. Республикаялъул нухмалъиялъ миллияб хазинаялъул унго-унголъунги тӀалаб гьабизе букӀиналде ракӀчӀана гьанже.
Кавсарат Сулейманова