ГIабдурахIман Данияловасул вас Юсуп, ДГУялъул физикиябгун математикаялъул факультет лъугIидал, хIалтIана ЛъаратIа районалда мугIалимлъун.

1967 соналда гьес лъугIизабуна ВГИКалъул режиссеразул факультет. Гьес бахъана чанго кинофильм ва гIахьаллъи гьабуна «Журналист», «Афоня», «Небеса обетованные», «Табор уходит в небо» гIадал фильмазда. «Мосфильмалда» режиссерлъун хIалтIулаго, гьес бахъана «Не было печали», «В ночь на новолуние» абурал фильмалги. КIиабилев режиссер хIисабалда, гIахьаллъи гьабуна «Бригада» фильм бахъиялдаги.

Амма Юсупил мурад букIана Шамилил ва ХIажимурадил хIакъалъулъ фильмал рахъизе. КигIан хIаракат бахъаниги, бажаричIо гьеб иш гьабун чорхол сахлъи загIиплъиялда бан. Гьелъул ургъалида вукIаго ккана тIоцебесеб инфарктги.

КIиабизе инфаркт ккана, МВДялда хIалтIулев вукIарав вас гIумруялдаса ватIалъидал.

Ю. Данияловасул рукъ кидаго букIана гьалбадерие нуцIа къалареб. Гьесухъ гIемер данделъулаан Расул ХIамзатов, ГIабдухаликъ ХIажиев, МухIамад Каримов, МухIамад Сулайманов, Россиялъул БахIарзал, космонавтал Игорь Волков ва МухIамад ТIолбоев.

Юсупие, эмен ГIабдурахIман, вукIана эменлъун гуревги, гьудулгьалмагълъунги. Гьев ками цIакъ захIмалъана Юсупие ва гьелъул хIасилалда лъабабизеги инфаркт ккана…

Гьев вукъун вуго инсуда аскIов МахIачхъалаялъул хабалалъ.

Рукъият ГIАЛИСУЛТАНОВА