11 августалда ДРялъул хIукуматалъул нухмалъулев ГIабдулмуслим ГIабдулмуслимовас тIобитIана республикаялда COVID-19 тIибитIизе биччангутIиялда тIад хIалтIи гьабулеб оперативияб штабалъул данделъи.

ГI. ГIабдулмуслимовасул рагIабазда рекъон, ахираб кIиго анкьалда жаниб коронавирусалъул цIияб инфекциялъ унтаразул ва стационарияб къагIидаялъ сах гьаризе кколезул къадар цIикIкIунеб буго.

Гьелде республикаялда бугеб хIадурлъиялъул суал борхидал, премьер-министрас бицана гьабсагIаталда больницабазда коронавирусалъ унтаразе хас гьабун 173 койка хIадурун бугин.

Гьединго ДРялъул хIукуматалъул нухмалъулес абуна унти бахун бугищали халгьабизе, гIадамаз тестал кьезе ккелиланги.

60 соналдаса цIикIкIараб ригьалъул, хроническиял унтаби ругел ва коронавирусалде данде прививка гьабун букIинчIел гIадамаз жамагIат бакIарарал бакIазда маскаби разе ккелин абуна ДРялъул Роспотребнадзоралъул управлениялъул нухмалъулесул ишал тIуралей Раисат Арбухановалъ.

Оперативияб штабалъул данделъиялъул ахиралда хIукму гьабуна гIемер гIадамал ракIарараб бакIалда маскаби раян ва гIуцIабазул нухмалъулез жидерго гIуцIабазда гьел рай тIалаб гьабеян ва дезинфекциялъул низам цIунеян малъа-хъваял гьаризе.