14 сентябралда республикаялъулго гIемерисел школазда тIобитIана «Дагъистаналъул миллияб квен» абураб фестиваль (флэшмоб). 2011 соналдаса нахъе, щибаб соналъул 15 сентябралда республикаялда кIодо гьабула Дагъистаналъул халкъазул цолъиялъул къо. Гьеб байрамалъул хIурматалда исана республикаялъул школаздаги миллияб кванилгун ва ратIлилгун лъай-хъвай гьабуна 1-8 классазул цIалдохъабаз.

 

  Дагъистаналъул миллияб кванил флэшмоб тIобитIана «Навигаторы детства» абураб проекталда рекъон. Гьелъул мурадги букIана Дагъистаналъул миллатазул батIи-батIияб маданият бихьизаби. Тахшагьаралъул, Расул ХIамзатовасул цIаралда бугеб 50- абилеб школалдаги тIобитIана Дагъистаналъул миллияб кванил фестиваль. Миллияб партал ретIарал гьитIичаз рихьизаруна жиде-жидер классазул улбузул хIаракаталдалъун гIуцIарал тепсиял. Щибаб классалъ гIуцIараб миллияб кванил столалъе къимат кьолеб букIана тарбия кьеялъул хIалтIухъабаз. ЦIалдохъабазеги миллияб кванил фестиваль унго-унгояб байрамлъун лъугьана, батIи-батIияб кванил хIалбихьана, республикаялда ругел халкъазул гIемерлъиги цолъиги бичIчIана.

Патимат СултIанмухIамадова