«Абилимпикс» — сакъатазе кумек

Сахлъи загIипал хIалтIудалъун хьезарулел руго

Дагъистаналда тIоцебесеб нухалда тIобитIана «Абилимпикс» абураб цIаралда гъоркь сакъатазда гьоркьоб махщелазул рахъалъ конкурсазул регионалияб чемпионат. 3-4 октябралда, Каспийскалъул «Энергия» ДЮСШалде ракIарун рукIана батIи-батIияб махщел кодосел гIолилал. ХIалтIи щвеялъе гIоло тIоритIарал къецазулъ гIахьаллъана сахлъиялъул рахъалъ гIунгутIаби ругезул 40 чи. ХIалтIуде росизе руго: психология, физическияб культура, программирование, массажист, таржамачи, бисеразул тIагIелал гьаризе ва тIансал рессизе махщел бугел гIолилал.

Дагъистаналъул хIукуматалъул председателасул тIоцевесев заместитель Анатолий Карибовас абуна ахирал соназда Дагъистаналда гIемераб хIалтIи гьабулеб бугин сакъатал гIадамазул гIумру лъикIлъизабиялъе. ДРялъул захIматалъул ва социалияб цебетIеялъул министр Расул Ибрагьимовас бицана чемпионаталда гIахьаллъицин рикIкIине бегьулин кIудияб бергьенлъилъун ва министерствоялъ хадубккунги хIалтIи балагьизе кумек гьабизе бугин.
«Абилимпиксалъул» кумекалдалъун рес щвана республикаялъул предприятиязул ва идарабазул вакилзабазда сакъатал гIадамалги хIалтIизе бажарулел рукIин бихьизабизе. «Сакъатал гIадамал социалияб рахъалъ цIуниялъул хIакъалъулъ» федералияб законалда рекъон, нусгоялдаса цIикIкIун чи хIалтIулеб предприятиялде кIигоялдаса ункъоялде щвезегIан процент сакъатазулги хIалтIуде росизе тIадаб буго. Нилъер гьанир руго 15 проценталдаса цIикIкIунги сакъатал хIалтIухъаби ругелги предприятиял, амма гьелъухъ киналгIаги бигьалъаби щоларел. Законалда рекъон, 50 процент сакъатал хIалтIухъаби ругел предприятиязе пачалихъалъ кумек гьабула. Гьединлъидал нижее бокьун буго ДРялъул Халкъияб Собраниялде хитIаб гьабизе гьеб 50 проценталъул бакIалда 10 процентгIаги сакъатал хIалтIуде росун кумек гьабулел предприятизе бигьалъиби гьариялъе нухал ратейин», — абун бицана ДГПУялъул декан ПатIимат ГIумаровалъ.
ПатIимат СултIанмухIамадова