Ак-Гель хIорил рагIалда кIиабилеб нухалда тIобитIана Каспиялъул ччугIил фестиваль
Гьелда гIахьаллъана Тарумовка, Гъизляр, Бабаюрт районаздасаги МахIачхъалаялдасаги ччугIил нигIматал хIадурулел предприятиял. Гьенибго бихьизабулеб букIана ччугIил нигIматазул квен хIадурулеб къагIидаги. БукIана гIуцIун «Меседил ччугIа» абураб лъималазул майданги.
Байрамалъул гIахьалчагIазде гьадинаб хитIаб гьабуна ДРялъул бетIер Рамазан ГIабдулатIиповас: «ЧчугIил нигIматал хIадуриялъул промышленность тIубанго чIунтизе тун букIана Дагъистаналда. 2013 соналда республикаялда бахъана ччугIил 2,5 азарго тонна. Нилъер халкъалъе къваригIараб ччугIил нигIматалъул анкьго процент гурони щолароан. Гьанже гьеб рахъалъ цебетIей букIина РФялъул Росдал магIишаталъул министерствоялъул кумекалдалъун. ГьабсагIаталда гIемер хIалтIи гьабулеб буго хIоразулъ ччугIа гIезабизе. Гьениб бухъулеб буго геотермалияб кIиго скважина. Рес буго хер кунеб ччугIил къадар 100 миллионалде бахинабизеги. Гьелдалъун кIицIул цIикIкIина осетралъул икра бахъиги. Гьелъие гIологи хIорил рагIалда рацIцIалъи цIунизе ккела дагъистанияз», -ан. ДРялъул бетIерас бицана Ак-Гель хIорил рагIалда гьабулеб бугеб паркалъул хIакъалъулъги.
Байрамалда вукIана РФялъул росдал магIишаталъул министрасул заместитель Игорь Кузин. Гьес абуна: «ЧчугIил промышленность цебетIезабизе гьабулеб хIалтIул хIасил бихьулеб буго жакъа. Дагъистаналда цебечIараб масъала буго, республикаялъе гуребги, тIолабго улкаялъего гIураб ччугIа гIезаби. Бихьулеб буго гьеб масъала тIубазабизе МахIачхъалаялда жигар бахъулеб букIин. Республикаялъул нухмалъиялъул битIараб пикру буго: пуланаб цо магIишаталда ччугIа гIезабун гIоларо – масъала тIубазе ккола киналго магIишаталги цолъун. Нижецаги кумек гьабила», -ян.
Фестивальги рагьун, ДРялъул бетIер Рамазан ГIабдулатIиповги, ДРялъул хIукуматалъул председатель ГIабдусамад ХIамидовги, РФялъул росдал магIишаталъул министрасул заместитель Игорь Кузинги дандчIвана ччугIа гIезабулел предприятиязул вакилзабигунги. Гьелдаса хадуб Ак-Гель хIоринибе биччана гIисинаб ччугIа.
ДРялъул бетIерасулги хIукуматалъулги пресс-хъулухъ