МахIачхъалаялда, Ярагъиясул цIаралда бугеб къотIноб лъуна ГIали ГIалиевасе памятник
МахIачхъалаялъул Ярагъиясул цIаралда бугеб къотIноб ДРялъул Спорталъул министерствоялда цебе лъуна СССРалъул спорталъул мустахIикъав мастер, эркенаб гугариялъул рахъалъ щуцIул дунялалъул, ичIцIул СССРалъул чемпион ГIали ГIалиевасе памятник. Гьеб рагьиялъул тадбиралда гIахьаллъана ДРялъул бетIерасул ишал тIуралев Владимир Васильевги, хIукуматалъул председателасул ишал тIуралев ГIабдусамад ХIамидовги, гьесул заместителасул ишал тIуралев Анатолий Карибовги, спорталъул министр МухIамад МухIамадовги ва цогидалги.
«Жакъа МахIачхъалаялда рагьулеб памятник ккола дунялалъулго кIваралъул ишлъун. Щайгурелъул ГIали ГIалиевги вукIана дунялалдаго гьеб спортивияб тайпа машгьур гьабуразул цоявлъун. 2018 соналда Дагъистаналда тIобитIизе буго эркенаб гугариялъул рахъалъ Европаялъул чемпионат. Гьенир гIахьаллъизе рачIарал спортсменазе, гьеб спортивияб тайпаялда хадуб халкквезе гьоболлъухъ рачIаразе кIудияб асар гьабизе буго памятникалъ. Гьелъухъ балагьидал, бихьулеб буго захIматалде бугеб рокьиялъ, кIвахI гьечIолъиялъ нилъ кидаго лъикIалде рачунеблъи, анищал тIуралеблъи. Европаялъул чемпионат нилъер республикаялда тIадегIанаб даражаялда тIобитIизе букIиналда щаклъи гьечIо ва хIадурлъи гьабулеб буго, киналго рахъал хIисабалдеги росун. Баркула дагъистаниязда гьаб кIвар бугеб лъугьа-бахъин», — ан абуна Васильевас.
ГIали ГIалиевасул вас Зулкъарнай ГIалиевас республикаялъул нухмалъиялъе ва данделъарал киназего баркала загьир гьабуна, эменги кIодо гьавун, тадбиралде рачIаралъухъ.
КIалъазе рахъарал ДРялъул Халкъияб Собраниялъул сахлъицIуниялъулгун социалияб политикаялъул комитеталъул председателасул заместитель МухIамадхан ГIарациловас ва Гъуниб районалъул бетIер АхIмад МухIамадовас бицана ГIали ГIалиевасул гIумруялъул хIакъалъулъ, ракIалдещвезаруна гIагараб районалда хурхарал гьесул цо-цо лъугьа-бахъинал.
ДРялъул Спорталъул министерствоялда цебе лъуралда релълъараб памятник лъун буго Швейцариялда FILAялъул штаб-квартираялда аскIобги.