25 февралалда ДГМУялъул гIелмиябгун лъай кьеялъул инновациязулаб централда тIобитIана профессор ГIабдурахIман ГIусмановас 70 сон тIубаялде сайгъат гьабураб, «Медицинаялъулаб лъай кьеялъул ва сахлъи цIуниялъул кIвар бугел масъалаби» абураб республикаялъулаб гIелмиябгун практикияб конференция.
Гьениб ГIабдурахIман ГIусмановасул хIакъалъулъ бицана ДГМУялъул ректор, профессор Сулейман Мамаевас, ДГМУялъул гIаммаб хирургиялъул кафедраялъул нухмалъулев Расул Мажидовас.
ГI. ГIусмановас Дагъистаналда медицинаялъул тIадегIанаб лъай кьеялъулъ ва сахлъи цIуниялъулъ лъураб кIудияб бутIаялъул хIакъалъулъ бицана ДРялъул физическияб культураялъул ва спорталъул министр МухIамад МухIамадовас, Дагъистаналъул пачалихъияб халкъияб магIишаталъул университеталъул президент ХIамид Бучаевас, ДРялъул сахлъи цIуниялъул министрасул заместитель Салман АхIмадовас, Халкъияб Собраниялъул сахлъи цIуниялъул комитеталъул председатель Висампаша Ханалиевас.
«ХIакъикъаталъул» хIалтIухъабазги баркула ГIабдурахIманида 70 сонил борхалъуде вахин. Гьарула щулияб сахлъи, хIалтIулъ лъикIал хIасилал. ГIага-божаразул, гьудул-гьалмагъзабазул, цадахъ хIалтIулезул хIурматалъ ва рокьиялъ хинлъизабеги дур ракI, рещтIинабеги гьелъулъ лъикIлъи, парахалъи.
