ДРялъул физкультураялъул ва спорталъул министр Сажид Сажидовас гьадинаб пикру загьир гьабуна ДРялъул бетIер Сергей Меликовас тIобитIараб пресс-конференциялъул хIакъалъулъ: «ДРялъул бетIерасул журналистазулгун, блогеразулгун ва жамгIиял гIуцIабазул вакилзабазулгун букIараб гара-чIвариялъ лъикIаб асар гьабуна дие. Дида Сергей Алимович лъала ракIрагьарав инсан хIисабалда. Гьеб дандчIваялъги тасдикъ гьабуна гьеб. Къиматаблъун дица рикIкIуна республикаялъул нухмалъулев щивасда бичIчIулеб мацIалда кIалъайги кьолел суалазухъ кIваркьун гIинтIамиги ва гьезие чIванкъотIарал жавабал кьейги.
Гьайгьай, жакъа республикаялда хIалуцараб хIал буго. ТIабигIияб балагь хъинтIана гIемерал гIадамазда. С. Меликовас абухъе, тIабигIияб балагь рещтIунеблъи нилъеда цебеккунго лъаларо. Кин бугониги, хIажат буго гьелдаса цIуниялъе тадбирал гьаризе — гIурумухъалда минаби рачIого тезе, токалъул мухъал цIигьаризе. АнцI-анцI соназ кIвар кьечIого тарал масъалаби дагьал гьечIо нилъер. БичIчIизе ккола: гьел тIагIинариялъул мурадалда хIалтIи гьабулеб буго; цоял тIуразарун руго ва цогидал республикаялъул бетIерасул берзукь руго. Гьес гьел тIуразарулел руго федералияб кумекалдаса пайдаги босун. Масала, токалъул масъалабазул хIакъалъулъ бицана гьес Федерациялъул Советалъул данделъиялдаги улкаялъул президентасулгун букIараб дандчIваялдаги.
ТалихIкъосиналъ, информалатазда камуларо хIакъикъат хисизабурал, гьеб тIекъаблъун бихьизабулел баянал. Бегьуларо, цIарги балъго гьабун, гьереси тIибитIизабизе, хасго каламалдаса жидеего санагIатал бутIабиги рехсон. Гьеб рекъон гьечIо дагъистаниязда.
Спорталъул рахъалъ абуни, республикаялъул нухмалъиялъул кумекалдалъун ралел руго спортивияб инфраструктураялъе хIажатал бакIал. Гьелдалъун нилъер спортсменазул бергьенлъабиги цIикIкIунел руго. БукIана гIумруялъе хIинкъи гьечIолъи цIуниги парахалъиги аслияблъун рикIкIунеб заман. Гьеб заманалда спорт цодагьаб нахъе ккун букIун батизеги бегьула, амма гьабсагIаталда цебетIей лъикIаб буго.
Аслияб масъала буго тIадхъел бугел спорталъул бакIал гIемерлъизари. Руго гьелъул мурадалда хIадурарал проекталги гьезул рахъкколелги. Бищунго хIажат буго МахIачхъалаялда тIадхъел бугеб бассейн бан бахъинабизе — гьеб буго миллиардалъулаб проект. Сергей Меликовасул жигараб гIахьаллъиялдалъун тIасияб соналда гьеб бан бахъинабизе ккола. РакIчIун абила: гьелъул кумекалдалъун республикаялда спорталъул тайпаби церетуркIила.
ЖамгIияталъулгун ракIрагьараб гара-чIвари кутакалда хIажат буго: гьеб ккола бокьараб суалалъе жаваб кьезе республикаялъул бетIер хIадур вукIиналъулги Дагъистаналъул цебетIеялъе гIоло гьев хIалтIулев вукIиналъеги нугIлъи гьабулеб хIужа», — ян.
Кавсарат Сулейманова
