Палестинаялда хурхун нилъер пачалихъалъул ва республикаялъул бутIрузул бугеб официалияб пикру нилъеда лъала. ГIайиб гьечIел гIадамазда тIад гьабулеб зулмуги, магIна гьечIеб питна-кьалги лъугIизе кколин ва жибго Палестинаялъги дунялалъул цогидал пачалихъазда гьоркьоб жиндирго къадруяб бакI кквезе кколин абураб пикру загьир гьабуна гьез. Гьеб пикруги сон ва жакъа бижараб гуро, анцI -анцI соназ хисичIого рагIизабулеб буго гьез гьеб дунялалдаго. Каспийскиялде, аэропорталде гьеб гъалмагъир гьабизе гIолохъаби гъуна интернеталда нахъаги рахчун, «дида хъвагеги хъваши лъугIугеги», — ян рукIунел, нахъегIанал хIалихьатал чагIаз. Гьединазе гьабулеб судги, тамихIги кватIи лареб батила. Кин бугониги, жидерго лъавукълъиялъул, гIолохъанлъиялъул хехаб ццималда квелъ базе кIоларого ккараб иш бугелъул гIолохъабазухъа гьеб, гьезие гьабулеб тамихI цIакъго къвакIизабичIого таниги бегьилаан букIараб. Гьанже хадубккунги гьединал ургъичIого гьарулел ишаздаса цIуна-къазе нилъги цогидалги рекIеда ратизе дарслъун хутIаги гьеб.
Ах1мад Лабазанов