Халкъазул цолъи – Россиялъул къуват!
Гьединаб цIаралда гъоркь «Россия - дир тарих» парк-музеялда микьабилеб сентябралда тIобитIана Регионазда гьоркьосеб конференция. Гьелда гIахьаллъана Россиялъул пачалихъияб миллияб политика гIумруялде бахъинабиялъул рахъалъ жавабиял федералиялги регионалиялги идарабазул вакилзаби: РФялъул президентасул администрациялъул нухмалъулесул заместитель МухIамадсалам МухIамадов, РФялъул Миллиял ишазул рахъалъ федералияб агентствоялъул нухмалъулев Игорь Баринов, ДРялъул бетIерасул ишал тIуралев Федор Щукин ва цогидалги.
Тадбиралда къиматал гьалбаллъун къабул гьаруна Россиялъул къого БахIарчиги. Гьел Дагъистаналде рачIун руго «Вахта Героев Отечества» абураб тадбиралда гIахьаллъизе.
Конференциялда гIуцIун букIана ункъо темаялда хурхараб дандеруссин. Гьенир гьаруна Дагъистаналъул хIукуматалдаги Россиялъул Халкъазул минаялдаги, гьединго миллияб политикаялъул рахъалъ жавабиял министерствабазулгунги бухьенал гIатIид гьариялъул хIакъалъулъ къотIи-къаялги.
Россиялъул Халкъазул рукъалъул хIаракаталдалъун парк-музеялъул жанахIалда тIибитIун букIана «Россиялъул халкъазул къиматаб хазина» абураб темаялда гIуцIараб выставка.
Конференциялъул гIахьалчагIазе кIудияб асар гьабуна «СВОИ» абураб проекталъул цебелъеялъги. Гьеб хIадурана Россиялъул Халкъазул рукъалъул директор Анна Полежаевалъул квербакъиялдалъун. Гьениб бицунеб буго КIудияб ВатIанияб рагъдаги Украинаялда унеб бугеб хасаб рагъулаб операциялдаги гIахьаллъарал улкаялъул батIи-батIиял миллатазул вакилзабазул щулияб гьудуллъи-вацлъиялъул хIакъалъулъ.
Конференция тIобитIулаго, ДРялъул Миллияб политикаялъулгун диниял ишазул министерствоялъ къотIи-къаял гьаруна улкаялъул анлъго регионалъул гьединалго идарабазулгун. КъотIи-къаязда кIвар кьолеб буго диназдаги миллатаздаги гьоркьосеб гьудуллъи-вацлъи щулалъизабиялде ва гьелъие хIажатал шартIал гIуцIиялде. Документал къабул гьариялъул аслияб мурадги буго, миллиябгун мацIазул хаслъиги цIунулаго, улкаялъул халкъазул цолъи гъункизаби.
Тадбиралда гIахьаллъана муниципалитетазул къокъабиги. Гьез тIиритIун рукIана миллиял мацIазда басмаялде рахъарал тIахьазулги, халкъияб устарлъиялъул тIагIел-алатазулги, миллияб кванилги выставкаби.
Кавсарат Сулейманова