Каспийскиялда ГIали ГIалиевасул цIаралда бугеб спортивияб кIалгIаялда тIобитIана эркенаб гугариялъул рахъалъ гIолилазда гьоркьоб Дагъистаналъул чемпионат.
КIиго къоялъ халатбахъараб гьелда ургуялде вахъана 300-ялде гIагарун спортсмен. Бищунго лъикIал хIасилал рихьизаруна ГIабдулрашид Садулаевасул спортивияб школалдаса атлетаз. Гьезул анцIила кIигоясе рес щвана СКФОялъул чемпионаталда гIахьаллъизе.
КIиабилеб бакI ккуна ХIамид ХIамидовасул цIаралда бугеб спортивияб школалда Анвар МухIамадхIажиевасда ва Шамилгун Жамал ГIалиевазда цере ругьун гьарулел спортсменаз. Гьезул анцIила цояв ине вуго СКФОялъул чемпионаталде.
Лъабабилеб бакIалде бачIана «Динамо» спортшколалъул команда. Гьелъул мухъилъа чемпионлъун вахъана анкьгояв.
