ГIадлу бугони, хIасилги букIуна

 

Россиялъул тIасабищараб команда финалалъул ункъил бутIаялде борчIана

Футболалъул рахъалъ дунялалъул чемпионаталде хIадурлъулаго, журналистазги, экспертазги, гIадатиял гIадамазги лъикIаб къимат кьолеб букIинчIо Россиялъул тIасабищараб командаялъе, гьелъул хIаялъе, хасго тренерасул хIалтIуе. Командаялъе нухмалъи гьабизе Станислав Черчесовасул гьунар гьечIин абулеб букIана гIемерисез.

Тренерасул гIунгутIабиги командаялъул загIипал рахъалги кIочана Россиялъул футболистал дунялалъул чемпионаталъул финалалъул ункъил бутIаялде рорчIидал. Гьанже улкаялъулго футболалъул эксперталги журналисталги лъугьун руго командаги тренерги веццизе. Станислав Черчесовас командаялъе нухмалъи гьабизе байбихьараб къоялдаса нахъего абулеб букIана гьеб дагь-дагьккун гъункулеб бугин, цIиял футболистаз хIаракат бахъулеб бугин, хIай камиллъулеб бугин. Гьайгьай, гьедин ккезеги ккана. Черчесовасда гурони кIвечIо гIолохъаналги хIалбихьи бугелги футболисталги цолъизарун хIай гIуцIизе, командаялъул мухъилъ гIадлу-низам чIезабизе.
Футболалъул рахъалъ дунялалъул чемпионаталъул финалалъул микьил бутIаялда Россиялъул футболистаз къуват борцана Испаниялъул командаялъулгун. ХIаялъул аслияб ва тIаде кьураб заманалда испаниялъулазда кIвечIо нилъеразул кавабахъе торгIо кьабизе. Жидерго ва дандиязул кавабахъе голал кьабуна Россиялъул футболистаз. ПалхIасил, гьеб хIаялда Россиялъул тIасабищараб команда бергьана. Финалалъул ункъил бутIаялда нилъерал хIазе руго Хорватиялъул командагун. Гьел финалалъул ункъил бутIаялда бергьана Даниялъул тIасабищараб командаялдаса.