К о р о н а в и р у с г у н къеркьолаго, къадаралде щварал тохтурзаби ракIалде щвеялъе монумент рагьани, лъикIаб букIинин абураб пикру загьир гьабуна гьал къоязда республикаялъул сахлъи цIуниялъул министерствоялда цебе бугеб ЖамгIияб Советалъ.
Гьединаб гьаригун республикаялъул ва тахшагьаралъул нухмалъулезул цIаралда рагьараб кагъат хъван буго гьез. Монумент эхетизе лъикIаблъун бихьизабун буго МахIачхъалаялда Медицинаялъул Академиялда сверухъ бугеб ахикь.
Амма гьеб ЖамгIияб Советалъул вакил, гIемерал соназ республикаялъул сахлъи цIуниялъул министрасул заместительлъун хIалтIарав ГIабдула ХIажиев тIуванго рази гьечIо гьеб пикруялда. Хъата-масан памятник базе гIедегIичIого, гьелда цере гьаризе кколел чанги кIвар бугел ишал ругин бицана гьес «ХIакъикъаталъе».
«Гьеб памятник баялда данде чIарав чи дун гуро, — ян абуна ХIажиевас. — Гьезул бахIарчилъиялъулги къо- хIехьеялъулги мисаллъун букIина гьеб гIун бачIунеб гIелалъе. Амма цин лъикI букIина хварал тохтурзабазул къадар мухIкан гьабуни.
Гьеб цо.
КIиабизе бугони, гьел хварал тохтурзабазул гIагарлъиялда зигараги базе рекъараб букIина.
Гьединго хваразул нахъе хутIарал бесдалал щал ругел, гьезие кинаб квачIакълъи бугеб абун, материалияб рахъалъ батаниги, гIаданлъиялъул рахъалдаса батаниги, кумек гьабуниги лъикI. Гьединаб тартиб букIине ккола гьарулел тадбиразул, бищун цебе гьабизе кколеб иш гьеб буго, памятниказул бицине рортичIого.
Тохтур хIисабалдаги гIадан хIисабалдаги гьединаб пикру буго дир. ГIурусазул кици буго, чода цебе гьоко балеб гIадат гьечIилан. Гьелда релълъунеб буго памятник баялъул ишги».
ЖамгIияб Советалъул вакиллъун кканиги, гьеб суал ХIажиевасда данд бан гьечIоан Cоветалъул цогидал вакилзабаз.
Карантин лъазабуралдаса, цере гIадин, данделъизе санагIат гьечIелъул гьанже.
Коронавирусалъул инфекциягун къеркьолаго, республикаялда кинавниги 40 тохтур гIумруялдаса ватIалъанилан бицана 17 маялда ДРялъул сахлъи цIуниялъул министр Жамалудин ХIажиибрагьимовас политолог Руслан Къурбановасул инстаграмалдасан гьабураб чIагояб эфиралдасан.
Жакъа къоялде щвезегIан гьеб сияхI чан чиясдалъун цIилъарабали мухIканлъизабулеб буго.