Болъихъ районалъул РахатIа бугеб буртабазул фабрикаялъул иш рес къотIараб хIалалде кколеб бугин лъазабуна гьелъул нухмалъулев ГIали МухIамадовас.
-ГIолохъаби гьенире хIалтIизе рачIунел гьечIо. Цебе лъабнусго чи хIалтIулев вукIараб фабрикаялда жакъа хутIун вуго къогогIан чи, гьелги руччаби.
ТIадежоялъе, фабрикаялъул къайи-цIа хисичIогоги бана гIемераб мех, техника басралъун буго. ГIолохъабазе бокьулеб гьечIо гьенир хIалтIизе, росу тун шагьаразде гочунел руго, -ян абуна фабрикаялъул нухмалъулес.
Амма гьадин хутIизе гIадаб фабрика букIинчIоха гьеб. Советияб заманалда, цохIо нилъерго улка гуребги, къватIисел пачалихъалги буртабаздалъун хьезарулаан гьелъ. Жакъайин абуни… Буртабаздаса инкар гьабун гIадатияб, хинаб ретIелго тIасабищулеб буго гIухьбузги.
Болъихъ районалъул РахатIа буртаби гьарулеб фабрика рагьана 1926 соналъ. МугIрузул Дагъистаналда рикIкIунел предприятиязул цояб букIана гьеб доб мехалда.
