Европаялъул чемпионаталде хIадурлъи

 

ДРялъул бетIерасул ишал тIуралев Владимир Васильевас тIобитIана данделъи

Данделъиялда Владимир Васильевас баркала кьуна президентасул рищиял тIоритIизеги гьениб гIадлу-низам букIинабизеги хIаракат гьа-
бурал пачалихъиялги муниципалиялги идарабазул нухмалъулезе. Централияб рищиязул комиссиялъги гьеб хIаракаталъе лъикIаб къимат кьунинги абуна гьес.

ДРялъул хIукуматалъул председателасул тIоцевесев заместитель Анатолий Карибовас бицана гугариялъул рахъалъ Европаялъул чемпионаталде гьабулеб хIадурлъиялъул хIакъалъулъ. «Каспийскалъул ГIали ГIалиевасул цIаралда бугеб Спорталъул кIалгIаялде бачун бахъана Интернетги, сотовияб бухьенги, бугелде тIадеги токалъул системаги. ГьабсагIаталда Спорталъул кIалгIаялда сверухъ рацIцIалъи гьабулеб буго. Гьарун руго волонтеразеги жамгIияб низам цIунулезеги хасаб партал босиялда бан къотIабиги. Тасдикъ гьаруна МахIачхъалаялъул аэропорталда гьалбал дандчIвазе ругел волонтеразул сияхIалги. Ургъулел руго Москваялдаса рачIине ругел самолетазул рейсазул къадаралда тIад, ай гьеб цIикIкIинабиялде кIваркьолеб буго.

Къецал рукIине ругел ва чемпионаталъул гIахьалчагIазги гьалбазги гIумру гьабизе бугел бакIазда лъезе руго банкоматал – гьелъулги къотIаби гьарун руго.

ХIадурун ва тасдикъ гьабун буго медицинаялъул кумек гьабиялъул планги», — ян бицана Карибовас.

Данделъиялда бицана «Анжи-Арена» стадионалдаги ГIали ГIалиевасул цIаралда бугеб Спорталъул кIалгIаялдаги гьоркьоб машинаби чIезаризе бакI гьабиялъулги, чемпионаталде щварал гьалбадерида Дагъистан бихьизабизе туризмалъул сапарал хIадуриялъулги, гостиницабазул хIалтIухъабазул лъай камил гьабулеб букIиналъулги хIакъалъулъги.