Гьаб анкьалда «ХIакъикъат» газеталъул редакциялда тIобитIана видеоконференция. ДандчIваялде ахIун рукIана республикаялъул хъутабазул ракьазда ругел школазул авар мацIалъул учительзаби, лъай кьеялъул управлениялъул куратор ва методист Нуцалай Мирзабековагун цадахъ.
Учительзабаздехун кIалъай гьабуна газеталъул редактор ГIумахан ГIумахановас, жавабияв секретарь МухIамадхIабиб МахIатIовас, мухбирзаби Шамай Хъазанбиевалъ ва Кавсарат Сулеймановалъ.
— Нилъеца цадахъ лъугьун гьабулеб буго гIаммаб хIалтIи – рахьдал мацI цIуни. Школалда бачIунеб гIелалъе нужецаги, газеталдаса магIарулазе нижецаги бицунеб буго миллаталъул гIадатал-гIамалазулги, маданият-адабиятлъулги, тарихалъулги хIакъалъулъ. Амма ахираб заманалда загIиплъулеб буго, тIоцебесеб иргаялда, нилъерго мацIалдехун бугеб бербалагьи. гIемерисел учительзабаз абула тIахьал гьечIилан. ТIахьал щвезегIан, масала, кIудияб кумек букIуна «ХIакъикъат» газеталъул. Миллаталъул матIулъун кколеб нилъер газета цIунизе ккола цадахъ лъугьун…
Гьадинаб букIана газеталъул хIалтIухъабаз учительзабазде гьабураб хитIабалъул магIна.
КIалъазе рахъарал учительзабазги бицана хъутабазул школазда мацI малъиялъе гьабулеб бугеб хIалтIул хIакъалъулъ.
— Нижер школазда гьеб рахъалъ гьабулеб хIалтIи квеш гьечIо. ГIемерисел учительзабаз хъван буго газетаги. Нижеца жеги щула гьабила нужергун бухьенги. Гьединго газеталъул гIумруялъулъ гIахьал гьарила цIалдохъабиги, — ян бицана гьез.
ПалхIасил, къотIи ккана газеталъулги учительзабазулги гьудуллъи жеги щула гьабизе.
Гьединалго видеоконференциял газеталъул редакциялъ тIоритIизе руго магIарул районазул цогидалги школазул учительзабазулгунги.
