Исана февралалдаса маялъул ахиралде щвезегIан «ХIакъикъаталъул» гьурмазда рахъана «Рагъул лъимал» абураб темаялда тIобитIараб конкурсалде рачIарал цIалдохъабазул хIалтIаби.
Конкурсалда гIахьаллъана Болъихъ, Гъизилюрт, Хасавюрт ва Хунзахъ районаздасаги Ленинкент поселокалдасаги ичIго цIалдохъан. Гьез нижехъе рачIана КIудияб ВатIанияб рагъул заманалда лъимерлъи арал жидерго гIагарчагIазул къисматалъул хIакъалъулъ бицунел макъалаби. РукIана рахъун авторасул ва макъалаялда бицунев чиясул сураталги.
ГIуцIун букIана кIиго номинация. ТIоцебесеб номинация – 5-8 классал. Гьелда гIахьаллъана: СултангIали Маллаев, ХIайбат ГIабдулаева, Камалодин ХIайдарбегов, МухIамад ХIасанхIусенов, МухIамад ХIусенов.
КIиабилеб номинация – 9-11 классал. ГIахьалчагIи: ПатIимат Лабазанова, Шамай ГIабдулмуслимова, ХIамзат ХIусенов.
Вузазул ва колледжазул цIалдохъабиги нижер конкурсалда гIахьаллъиялде хьул букIинчIо. Амма ниж рази гьаруна ДГУНХялъул студентка СаихIат НурмухIамадова гIахьаллъиялъ.
Конкурсалъул аслияб мурад букIана рагъул кьогIлъигун захIмалъи хIехьарал нилъер ракьцоязул къисмат рагьи. Гьеб махщалида бихьизабуна Болъихъ районалъул МигIарсо росулъа ХIайбат ГIабдулаевалъ, ПатIимат Лабазановалъ, Шамай ГIабдулмуслимовалъ, Ленинкенталдаса Камалодин ХIайдарбеговас ва МухIамад ХIасанхIусеновас, Хунзахъ районалъул ТIанусиса СаихIат НурмухIамадовалъ.
Рехсарал цIалдохъабазул хIалтIабазулъ якъинго цебечIолеб буго мех щвелалдего «кIодолъун рачIарал» лъималазул гIумру. Гьезул макъалаби цIалараб мехалда, нилъеда бихьулеб буго, рагъде бихьиналги ун, магIарул росабалъ хутIарал руччабазгун лъималаз хIехьараб захIматаб гIумру. Гьез гьабулаан колхозалъулги рукъалъулги хIалтIи. Свак-унтиялъул ва ракъи-къечалъул бицун зигардичIого, дол соназул лъимал регIулаан дарсал гьаризеги, школалъул тIадкъаял тIуразаризеги, батулаан заман эбелалъе кумек- квербакъиялъеги. Хьул буго, цIалдохъабазул макъалабиги цIалун, умумузул яхI-намусалдаса чIухIарал ва гьезул бахIарчияб къисматалъе мустахIикъал гIолилал куцаялъулъ редакциялъ лъураб гьитIинаб бутIаялъул мурад тIубаялде.
Баркала буго редакциялъулгун бухьен тIезе толарел цIалдохъабазе! Жеги баркала буго газеталъулгун гьудуллъи щулиял ва нижер тадбиразул рахъ кквезе жигаралда хIалтIулел магIарул мацIалъул учительзабазе: Болъихъ районалъул МигIарсоса Жамилат ХIамзатовалъе, Хасавюрт районалъул Къарланюрталдаса МухIамадрасул МухIамадовасе, Ленинкенталдаса ПатIимат ХIайдарбеговалъе.
Конкурсалъул хIасилал гьаризе ва гIахьалчагIазе сайгъатал кьезе руго хасаб тадбиралда. Гьелъул хIакъалъулъ лъазабила газеталдасанги интернет-сурсатаздасанги.
