Арзулум Илясовасул хIурматалда футболалъул рахъалъ турнир

 

5-6 октябралда, МахIачхъалаялда, ДРялъул Лъайкьеялъул ва гIел­муялъул министерствоя­лъул РДЮСШялъул спортком­плек­салъул футболалъул май­даналда ихтияр цIуниялъул гIуцIабазул хIал­тIухъабазда гьоркьоб, Россия­лъул БахIарчи, милициялъу­л полковник Арзулум Илясов ра­кIалде­щвезавиялъул хIурматалда фут­болалъул турниралъул тIоцебе­себ этап тIобитIана.
Арзулум Илясовасул нухмалъиялда гъоркь Дагъистаналъул СОБРалъ 1282 хасаб операция тIобитIана, яргъид гIуцIарав 652 такъсирчи ккуна, Чачаналда рикъарал ва ихтияр гьечIого ккун вукIарав 148 чи эркен гьавуна. Турнир гIуцIана Дагъистаналъул «Динамо» ФСО ГОялъул, ДРялъул Лъайкьеялъул ва гIелмуялъул министерствоялъул РДЮСШялъул, Россиялъул халкъазул ассамблеялъул ДРОялъул квербакъиялдалъун.
Гьенир гIахьаллъана Россиялъул ДРялда бугеб МЧСалъул бетIераб управлениялъул, ДРялъул Жанисел ишазул министерствоялъул, ДРялъул прокуратураялъул, РФялъул ДРялда бугеб ЦIех-рехазул комитеталъул цIех-рехазулаб управлениялъул, хIинкъигьечIолъиялъул федералияб хъулухъалъул управлениялъул, Миллияб гвардиялъул аскаразул федералияб хъулухъалъул управлениялъул, ДРялъул Верховный судалъул ва республикаялъул цогидалги управлениязул къокъаби. Футболалъул турниралда гIахьаллъана кинабниги 13 команда.
Турнир рагьиялъул тадбиралда гIахьаллъана дунялалъулго щуцIул чемпион, «Динамо» ФСОялъул председателасул заместитель Загъалав ГIабдулбегов, МахIачхъалаялъул РСДЮШОР-2-ялъул директор Александр Макаров, ДРялъул Росгвардиялъул управлениялъул нухмалъулесул ишал тIуразарулев МухIамад МухIамадов, Россиялъул халкъазул ассамблеязул ДРОялъул советалъул председатель, БахIарчиясул вац Зик­рула Илясов.
Футболалъул къецал 13 октябралдаги тIоритIизе руго. Турниралда бергьаразе кубокал ва къиматал сайгъатал кьезе руго гьеб къоялъ.

216-яс гIахьаллъи гьабуна
Суракъат Асиятиловасул призалъе гIоло

5-6 октябралда Шамил районалъул центр ХIебда росулъ тIобитIана машгьурав спортсмен ва политикияв хIаракатчи Суракъат Асиятилов ракIалдещвезавиялъул хIурматалда 2003-2004 соназда гьарурал гIолилазда гьоркьоб эркенаб гугариялъул ра­хъалъ иргадулаб турнир.

Къецазда гIахьаллъизе рачIун рукIана Узбекистан, Молдова улкабаздаса, Ингушетиялдаса гIолилал, ай кинабниги 26 команда. Турнира­лъухъ балагьизе рачIаразда гьоркьор рукIана Хунзахъ, Хьаргаби районазул бутIрул, ДРялъул туризмалъул рахъалъ министр Расул Ибрагьимов, ДРялъул нухазул комитеталъул нухмалъулесул заместитель МухIамад ТIагьиров, ДРялъул сахлъицIуниялъул министрлъун вукIарав Танка Ибрагьимов, Суракъатил божарав гьудул, Россиялъул мустахIикъав тренер Ингушетиялдаса ГIумар Хабиев ва цогидалги.
Турнир рагьулаго, Шамил районалъул бетIер МухIамад ХIасановас бицана Суракъатил гIумруялъул хIакъалъулъ ва абуна гьев вукIанин машгьурав спортсмен гуревги, жамгIиявгун политикияв хIаракатчигиян. Баркиялъулал кIалъаял гьаруна ДРялъул мугIрузул зонаялда вугев нухмалъулесул вакил МухIамад Камиловас, Хьаргаби районалъул бетIер Рамазан Малачиевас, ДРялъул туризмалъул рахъалъ министр Расул Ибрагьимовас, Ингушетиялдаса ГIумар Хабиевас.
КIиго къоялъ халатрахъарал къецаздаса хадуб тIоцебесеб бакI ккураллъун рикIкIана 44 кг цIайиялда Салимов Къурбан (Болъихъ район), 48 кг — АхIмадудинов Элдар (Гъизляр), 52 кг — ГIабдулаев МухIамад (Хасавюрт), 57кг — ГIабдулкъадиров ТIалхIат (Хасавюрт), 62 кг – ГIабдурахIманов МухIамадрасул (МахIачхъала), 68 кг — ГIабдулаев Адам (Шамил район), 75 кг — Дайитбегов МухIамад (Шамил район), 85 кг — Нуров ГIали (Шамил район), 92 кг Гасубеков СагIид (МахIачхъала).
Къецазда гIахьаллъана 216 гугарухъан. Районалда гьезие чIезарун рукIана санагIатал шартIалги. ТIоцебесеб бакI ккуразе кьуна 15 азарго гъурущ, кIиабилеб бакI ккуразе — 10 азарго гъурущ ва лъабабилеб бакI ккуразе – щуаза-азар гъурущ. ГIарцулал ва цогидалги шапакъатаздалъун кIодо гьаруна тренералги судьябиги. РукIана шапакъатал Асиятиловазул хъизамалъул рахъалдасанги.
Гьединго данделъиялда кIодо гьавуна дагьалъ цебе дуняла­лъул чемпионаталда эркенаб гугариялъул рахъалъ мазгарул медаль босарав ракьцояв Нуров МухIамадхIажиги.
Сайпула ГьитIинамухIамадов