ГIураб къадар нилъеегоги тун…
Москваялда тIобитIулеб буго халкъазда гьоркьосеб агропромышленнияб форум ва «Меседилаб хасалихълъи — 2019» абураб выставка. Форумалда тIобитIараб сессиялда гIахьаллъана ДРялъул вице-премьер ГIабдулмуслим ГIабдулмуслимовги ДРялъул росдал магIишаталъул ва продовольствиялъул министр Абзагьир ХIусеновги. Данделъиялда бицана дунялалъулго рынокалда Россиялъул нигIматал ричиялъул ругел ресал лъикIлъизариялъул хIакъалъулъ. Экспертазул хIисабазда рекъон, Россиялъул рахъалдаса дунялалъулго рынокалда тIабигIиял нигIматазул 10 процент бичизе рес буго.
Дагъистаналъул рахъалдаса выставкаялда рихьизе лъун рукIана 30-ялдаса цIикIкIун предприятиялъул ва ункъо магIишаталъул нигIматал.
«Меседилаб хасалихълъи» форумалда рес ккола инвесторазулгун лъай-хъвай гьабиялдаго цадахъ къотIи-къаял гьаризеги. Нижеца «Батыр Бройлер» ОООялъулгун ва Екатеринбургалдаса компаниялъулгун 75 миллион гъурщил багьаяб кIалцIи гьабулеб завод баялъе къотIи гьабуна. ЦохIо «Батыр-Бройлер» предприятие гуребги, гьеб заводалъ кIалцIудалъун хьезаризе руго республикаялъул хасал ва фермеразулал магIишаталги. Гьединго республикаялда гIиял ва хIанчIил гьан къватIисел улкабазде бичиялъулги къотIи-къаял гьаруна. Азербайжаналъе бичизе буго хIанчIил гьан», — ан бицана Абзагьир ХIусеновас. Гьесул рагIабазда рекъон, регионалъ жигараб гIахьаллъи гьабулеб буго АПКялъул нигIматал къватIисел пачалихъазе ричиялъулъги. КъватIисел улкабазе бичулеб буго 30 процент гIиял гьанал, 1200 тонна бичизе бихьизабураб бакIалда бичана 2000 тонна. Хадубккунги гьеб къадар цIикIкIинабизе ракIалда буго, республикаялда жаниб хIажалъулеб къадарги дагьлъизабичIого.
ПатIимат СултIанмухIамадова
Дагъистаналъ къватIисел пачалихъазде ричулел росдал магIишаталъул нигIматал цIикIкIинаруна
