100 школа
Халгьабуна проект гIумруялде бахъинабиялъул
МахIачхъалаялдаги Каспийскалдаги къачIалел руго «100 школа» абураб проекталда гьоркьоре арал школал. Гьеб иш кинаб хIалалда бугебали халгьабуна ДРялъул экономикаялъулгун территориалияб цебетIеялъул министр ГIусман Хасбулатовасги, гьесул заместитель ГIабдурахIман ГIабдурахIмановасги, ДРялъул лъайкьеялъул министрасул заместитель Арслан Бачиевасги, МахIачхъалаялъул лъайкьеялъул управлениялъул начальник ТIагьир Мухтаровасги.
Гьел цин щвана МахIачхъалаялъул №51 школалде. Гьениб къачIалеб буго тIох ва базе буго цIияб котельная. Гьел хIалтIаби хехлъизареян лъазабуна комиссиялъ.
№34 школалда кьучIдасанго къачIалел руго спортзалги душеваяги. Гьенир хIалтIулел устарзабаздехун гIезегIан суалал рукIана комиссиялъул. Гьез лъазабуна чIабар цIидасан къачIайилан. «Нужеца чIабар къачIалеб куцалъухъ балагьун, бичIчIулеб буго, цо чанго соналдасан гьеб цIидасан туризе бугеблъи. Гьедин ккунгутIизе, батIияб къагIида балагье»,- ян лъазабуна подрядчикасда. Гьесги рагIи кьуна чIарбида гъоркь цементалъул гъат лъезе.
Рехсараб проекталда рекъон, №8 лицеялда, цIулал гордазул бакIалда, лъолел руго пластикаялъул гордал ва цIигьабулеб буго тIох. Гьениб гьабун батана гIураб хIалтIи.
Ахиралда комиссия щвана №4 школалде. Меценатазул гIарцухъ гьениб тIубанго хисана школалъул мина хинлъизабулеб къагIида. Гьарулел руго цIаккеялдаса цIуниялъул тадбиралги.
Гьединаб халгьаби щибаб гьатIанкъоялъ букIине бугин лъазабуна ГIусман Хасбулатовас.
Каспийскалъул школазде ГIусман Хасбулатовасда цадахъ щвана ДРялъул хIукуматалъул председателасул заместитель – ДРялъул лъайкьеялъул министр Уммупазил ГIумароваги. Гьез халгьабуна №8 лицеялъул – гьенир цIигьарулел руго хIажатханаби ва хисулеб буго данделъабазул залалъул чIабар. Лицеялъул директор Рашид ГIабдулаевас абуна, ракIалда бугин лъел мухъалгун гордалги хисизеян.
№3 школалда хисун буго 48 горду ва къачIан буго щуго хIажатхана. Жеги гьедигIанго хIажатхана къачIазе ккола ва хисизе ккола канализациягун школа хинлъизабиялъул къагIида. Гьенир гьарулел хIалтIабазда хадуб халкколеб бугин проекталда гIахьаллъулев меценатасин бицана школалъул директорас.
Каспийскалъул №4 школалдеги щвана комиссия. Гьенир хисун руго 1973 соналдаго лъун рукIарал гордал. Жеги къачIазе руго хIажатханаби ва хисизе руго кабинетазул нуцIби.
ДРялъул Лъайкьеялъул министерствоялъул пресс-хъулухъ
