Божилъи хвезе теларо
ДРялъул бетIерасул ишал тIуралев Владимир Васильевас тIобитIана терроралде данде
къеркьеялъул комиссиялъул данделъи
Гьениб бицана муниципалиял районаздаги шагьаразул округаздаги терроралде данде къеркьеялъул комиссиязул хIалтIи камил гьабиялъе нухал ратиялъул хIакъалъулъ. Хасаб кIварбуссинабуна риидал лъималаз хIухьбахъулел бакIал цIуниялдеги.
«Гъизляралдаги Кемеровоялдаги ккарал гIадинал лъугьа-бахъиназдаса ва республикаялда парахалъи цIуниялъулъги кIудияб бутIа лъолеб буго терроралде данде къеркьеялъул комиссияз. Гьелъухъ дица киназего баркала кьола», – ян абуна Васильевас.
ТIолабго дунялалъго Дагъистаналъе лъикIаб къимат кьейлъун гьес рикIкIунеб буго МахIачхъалаялда Европаялъул чемпионат тIобитIизе хIукму гьаби. Гьелда бан, ДРялъул нухмалъулес гьадин бицана: «Республикаялда парахатаб гIумру букIинчIебани, спортивияб гугариялъул рахъалъ Европаялъул чемпионат гьаниб тIобитIизе ихтияр кьелароан. Амма, улкаялъул президент Владимир Путиница абухъе, чIара-хьараб хIал букIин кколаро цебетIейлъун. БукIине кколеб даражаялда чемпионат тIобитIун бажарани, нилъее рес щвезе буго цебетIеялъеги, тIадеги сурсатал щвеялъеги, божилъиялъул кьучIалда гIуцIарал цIиял бухьенал гьариялъеги», — ян.
Данделъиялда бицана террористазул къокъабаздаса дагъистаниял цIунизе ккеялъул хIакъалъулъги. Гьелъул мурадалда хIалтIул цIиял къагIидаби ургъизе ккелинги абуна. Гьеб хIаракаталъулъ диниял церехъабиги, жамгIиятги, культураялъул хIаракатчагIиги хIалтIизаризе кколинги абуна. «Нилъер гIадамал чIвазеги, кьвагьизаризеги, рухIизеги тезе бегьуларо. Гьеб буго нилъеда бараб иш. Руго гьелъие хIажатал сурсаталги», – ян абуна Владимир Васильевас.
Республикаялъул гIумру лъикIлъизабулеб шартIлъун гьес рехсана экономикияб бутIаялда лъикIал хиса-басиял кколел рукIинги.
Россиялъул ФСБялъул ДРялда бугеб управлениялъул начальникасул заместитель Андрей Широковас бицана халкъазда гьоркьосел террористазул чукъби ралагьиялъул мурадалда муниципалиял районазулги шагьаразул округазулги терроралде данде къеркьеялъул комиссияз гьабулеб хIалтIул хIасилазул хIакъалъулъ.
Лъималаз риидал хIухьбахъулел идарабазда бугеб хIалалъул хIакъалъулъ бицана ДРялъул хIукуматалъул председателасул заместитель, ДРялъул лъайкьеялъул ва гIелмуялъул министр Уммупазил ГIумаровалъ.
Рехсараб министерствоялъулгун щулияб бухьен бугин абуна ДРялъул МВДялъул министр ГIабдурашид МухIамадовас. Киналго риидалил лагеразда хъаравуллъи гьабизе буго полициялъул кIи-кIи офицерасинги абуна гьес.
Данделъиялдаса хадуб гьелъул гIахьалчагIаз тIугьдул лъуна исана февралалда Гъизляралда теракт гьабиялъул хIасилалда хваразул хабада цере.
