6 апрелалда ДРялъул хIукуматалда тIобитIараб данделъиялда Сергей Меликовас къимат кьуна арал гIодоркъояз Чачаналдаса чотIахъаби республикаялде рачIиналъе.
Гьеб лъугьа-бахъин ккана 3 апрелалда. Новолак районалда вукъун вугев имам Шамилил наиб Беноялдаса Байсунгъурил хабаде зияраталъ вачIун вукIана Чачаналдаса 29 чотIахъан. «Ахмат-сила!» — ян ахIдолел гьел лъалхъизаруна полициялъ.
Гьединал тадбирал бакIалъулаб нухмалъиялда дандги ран гьаризе кколин бицана низам цIунулез.
С. Меликовас абуна жив цIакъ рази вугин нилъер жамгIияталъул церехъабазги жибго халкъалъги гьеб хIужаялда хурхун загьир гьабураб пикруялдаса, амма щибаб ккараб-таралъул букIунин жиндирго хIасил. Гьелъул хIисаб гьабизе тIадаб бугин щивав чиясда. Гьесул рагIабазда рекъон, щибго гьечIеб бакIалда питна бижизабизе къваригIун, цIадабе нарт тIолел чагIиги камуларо. Амма гьединал чагIи зобалаздаса накIкIгIанги рикIкIад гьаризе ккола.
Меликовасул пикруялда, гьеб лъугьа-бахъиналдалъун бихьулеб буго республикаялда миллияб политикаялъул хIалтIулъ гIунгутIаби рукIин.
Гьединлъидалин абуна С. Меликовас, жинда лъикIаблъун бихьулила нилъедаги Чачан республикаялдаги гьоркьор вацлъиялъул бухьенал щула гьариялъул хIалтIи цIи гьабизе. Гьеб мисал, цохIо чачаназда хурхун гуребги, цогидал республикабазда гьоркьобги букIине кколин тIадеги жубана гьес.
