5 апрелалда республикаялъул спорталъул министрасул заместительлъун тасдикъ гьавуна Будун Будунов. Чанго соналъ гьес нухмалъи гьабуна республикаялъул футболалъул федерациялъе.
Амма гIемерисезда Будунов ракIалда вуго машгьурав футболист хIисабалда. 1995 соналъ гьев вачIана «Анжи» командаялде ва чанго соналъ вукIана бищунго церетIурал футболистазул цоявлъун.
Республикаялъул спорталъул ва физическияб культураялъул министрасул заместительлъун Б. Будунов вукIана 13 соналъ цевеги. 2016 соналда Будун вукIана Хасавюрт районалъул бетIерасул заместительлъун. 2019 соналда гьесда тIад къана Футболалъул федерациялъе нухмалъи гьабизе.
Гьанже республикаялъул рехсараб министерствоялъул нухмалъуда вуго машгьурав лъабго спортсмен. Сажид Сажидовасул кIиабилев заместитель ккола 2004 соналъ Олимпиялъул чемпионлъун вахъарав боксер ХIайдарбег ХIайдарбегов.
