25-30 августалда Сочиялда тIобитIана «ТIолабго Россия» абураб журналистазул форум. Гьелда гIахьаллъана нилъер улкаялъул киналниги регионаздаса, Белоруссиялдаса, Абхазиялдаса, Китаялдаса ва Кореялдаса журналистал. Форум тIобитIула Россиялъул президентасул гранталда рекъон. Исана гьеб гIуцIун букIана 30-абилеб нухалда. РукIана гьенир гIахьаллъулел пачалихъиял хIакимзабиги бизнеса­лъул вакилзабиги.

Форумалъул гIахьалчагIазде саламалъул хитIаб гьабуна ва форумалъе икъбал гьарана Сочи шагьаралъул бетIер Андрей Прошуниница. «Хасаб рагъулаб операция тIобитIулеб заманалда, санкцияздалъун нилъер улка гъанкъизабизеги нилъеда гьоркьоб питна бекьизеги хIаракат бахъулеб къуватги букIаго, нилъеда тIадаб буго квешлъиялде данде цадахъ рахъун къеркьезе. Гьеб къеркьеялда кIвар бугеб бакI ккола пачалихъиял СМИязул журналистазги ватIан хириял блогеразги: гьез нилъер халкъ гъункизабула ва, гучаб пачалихъ цIуниялъул мурадалда, президентасда сверухъ цолъизе кколилан малъула», - ян абуна гьес хитIабалда.

Форумалъул тIоцебесеб къоялда букIана «Медиавызовы и пути их решения» абураб данделъи. Гьелда гIахьаллъана Россиялъул Журналистазул союзалъул председатель Владимир Соловьев, «Московский комсомолец» газеталъул бетIерав редактор Павел Гусев ва рагъулав мухбир, Россиялъул БахIарчи Евгений Поддубный. Данделъи нухда бачана телеведущий Эрнест Мацкявичюсица.

Владимир Соловьевас абуна Рос­сиялъул журналистасул этикая­лъул цIияб кодекс хIадурулеб бугилан. Гьелда цIикIкIараб кIвар буссинабизе буго журналистасулги искусственнияб интеллекталъул (ИИ) технологиязулги бухьенал гIуцIиялдеянги бицана гьес. «ИИялъул къорикье кколел руго гьелъул кумекалдалъун рокъобе кьураб тIадкъай тIубазабулел нилъер лъи­малги кIвахIалал журналистал­ги. Текст хъваялъул ва гьеб тIи­би­тIизабиялъул цIиял технологиял раккараб заманалда хIажат буго журналистасул этикаялъул цIияб кодекс. Гьеб тасдикъ гьабизе буго 2027 соналда, Россиялъул журналистазул XIV съездалда», - ян абуна В. Соловьевас.

Евгений Поддубныяс бицана ра­гъулаб операциялъул заманалда халкъалъул божилъи ва гьересиял баяназдаса жамгIият цIуниялъеги журналистикаялъул бугеб кIвара­лъул хIакъалъулъ.

Гьанже заманалъул журналистикаялъул хаслъиялъулги жинди-жиндир пикрабазулги хIакъалъулъ бицана 60 федералияв спикерас. Форумалъул гIахьалчагIазе гIуцIун рукIана къадруял ва махщел тIокIал публицистазул мастер-классал, пресс-конференциял, бахIсал ва гур­гинал столал. ХIалтIулеб бу­кIана цIиял медиапроекталги технологиялги церелъураб выставкаги.

29 августалда форумалда бицана журналистазул гIумруялъе хIинкъи гьечIолъи цIуниялъулги редакциязе хIалтIухъаби ралагьиялъул рахъалъ ругел масъалабазулги хIакъалъулъ. Масала, «Российская газеталъул» бетIерав редакторасул тIоцеесей заместитель Елена Березиналъ бицана тарихазулаб заманалда хIинкъи гьечIолъи цIуниялъул хIакъалъулъ. Гьеб рахъалъ чIезабизе ккола хасаб низам. Нагагь, гьелъул пикруялда рекъон, журналистас гьеб низамалъул тIалабал цIунулел ругони, амма редакциялъ гьезул сан гьабулеб гьечIони, ккезе бегьулел лъугьа-бахъиназул мисалалги рачана гьелъ.

Кин гIарац балагьилеб регионалиял СМИяз жидерго проектал гIумруялде рахъинариялъе? Гьелъул хIакъалъулъ бицана «Коммерческие успешные кейсы и спецпроекты в региональной прессе» абураб данделъиялда. Пайдаяблъун гьениб рехсана федералиял миллиял проектазда гIахьаллъи ва гьезул хIакъалъулъ баянал прессаялда кьей. Президентасул грантазул фондалъул исполнительнияв директор Антон Долговас абуна, редакциялъул щугониги чиясул рес бугила гьединал проектазда гIахьаллъизе ва щуго миллионгIанасеб гъурщил гранталъе мустахIикълъизе.

«Вести. Дежурная часть» телепрограммаялъул редактор, Россиялъул Журналистазул союзалъул председателасул заместитель Алексей Вишневецкияс бицана журналистас цIех-рех кин тIобитIилебали.

Киназего бокьана филологиял гIелмабазул кандидат, «Россиялъул бищун лъикIаб 10 газета» абураб конкурсалъул экспертияб советалъул председатель, Журналистазул союзалъул секретарь Владимир Касютиница нухда бачараб «Журналистика и медиарынок» абураб данделъи. Гьениб мухIканаб къимат кьуна исанасеб конкурсалде ритIун рачIарал хIалтIабазе.

30 августалда, форумалъул ахи­рисеб къоялда, мустахIикъал журналистазе, редакциязе ва фору­малъе квербакъаразе шапакъаталгун сай­гъа­талги кьуна Владимир Соловьёвас.

Кавсарат Сулейманова