Дагьал церегIан къоязда АхIулгохIде зияраталъ вачIун вукIана магIарулазул чIухIи, боксалъул рахъалъ Европаялъул чемпион ГIашалаев ЧIегIерав. КIочонареб дандчIвай букIана гьеб. ЧIегIерав ва гьесул гIагарлъиялъул анцIгогIанасев чи вукIана гьалбадерил къокъаялда гъорлъ. Гъазизабазул биялъ чурарал кьурабаз, щибаб гамачI гIодулеб АхIулгохIалъ, чIухIигун дандчIвай гьабуна спортсменасда.

Исламалъул тарихалда холареб лъалкI тараб, магIарулазул бахIарчилъиялъул, къохIехьеялъул, диналъе ритIухълъиялъул нугI буго АхIулгохI. ГIемерал магIарулазул, Россиялъул ва къватIисел пачалихъазул хъвадарухъабазул, поэтазул, художниказул ракI хIайран гьабураб, гьез гIемерал асарал жинде гьарураб ГохI, нилъер заманалда рикIкIен гIемерал зияратчагIазул, туристазул, тарихчагIазул, гIалимзабазул ракI тIаде цIалеб бакI буго АхIулгохI.

ГIарабиялдасагун Турциялдаса, Франциялдасагун Германиялдаса, Индонезиялдасагун Малайзиялдаса, киналгIаги СССРалда рукIарал пачалихъаздасаги зияратчагIи рачIуна гьанире. ГIемерал бусурбабаз дугIа гьабула гъазизабазе, чвахулаго магIугун гIенеккула гьаниб букIараб рагъул хабаралъухъ. Армиялде унел гIолохъаби, СВОялъул гIахьалчагIи рачIуна рагъде иналде, бергьенлъигун тIадруссагиян гьаризе. Ригьин гьабулел бахIарал рачIуна дугIа гьабизе.

Боксёр ЧIегIерасда ва гьесул гьалмагъзабазда дандчIвазе АхIулгохIде рачIун рукIана ГIашилтIаса, ЧIиркъатIаса ва Генуса цIалдохъабигун жамагIатазул вакилзаби. ЦIалдохъабазе боксёрас бицана жиндирго спортивияб гIумруялъул, дандчIварал захIмалъаби къинаризе кумек гьабунин магIарул яхIалъ ва цересел умумузул бахIарчияб тарихалъ. Чемпионас АхIулгохIалъул музеялъе сайгъат гьабуна цIулал буцIун гьабураб мугIрул цIумалъул сурат. ЦIалдохъаби цIакъ рохун рукIана ЧIегIерасда цадахъ сурат бахъизе щвеялъги. Лъималазе ва чIахIиязе кIочонареб дандчIвайлъун букIина гьеб.

Ибрагьим Ибрагьимов, «АхIулгохI» мемориалияб комплексалъул гIелмияв хIалтIухъан