2020 соналъул 25 январалда, Москваялъул ХIукуматалъул Концертазул залалда тIобитIана генерал-полковник МухIамад Танкаевич Танкаев ракIалде щвезавиялъул, гьесул 100 сон тIубаялъе сайгъат гьабураб данделъи.
Гьеб тадбиралъул гьалбадерида бихьизабуна, КIудияб Бергьенлъиялъул тарихалъулъ бищунго гвангъараб бутIалъун лъугьараб хвалил лагерь Освенцим эркен гьабиялъул гIаламатлъун лъугьараб, цогидаз мисал босизе мустахIикъаб МухIамад Танкаевасул гIумруялъул нухалъул хIакъалъулъ М. Шахмановас бахъараб фильм.
Данделъи рагьана РФялъул президентасда цебе бугеб Дагъистан Республикаялъул кидагосев вакиласул заместитель ХIамзат ХIамзатовас ва Москваялъул маданияталъулаб «Дагъистан» централъул президент Арсен ХIусеновас.
Данделъиялда гIахьаллъана: Рагъулаб институталда М. Т. Танкаев хIалтIулел соназда, гьенив политотделалъул начальниклъун вукIарав генерал-лейтенант А. П. Афанасьев, Москва шагьаралъул Яргъилал Къуватазул ветераназул Комитеталъул председатель, генерал-майор А. Ф. Голобородов, ЖамгIияб хIинкъи гьечIолъиялъул Халкъазда гьоркьосеб агентствоялъул генералияв секретарь, юстициялъул генерал-лейтенант Х. М. Джантаев, КъватIисел улкабазул мацIазул рагъулаб институталъул, Ветераназул союзалъул председатель Е. Л. Логинов, ГIелмиябгун лъай тIибитIизабиялъул «Холокост» централъул лъай кьеялъулаб отделалъул нухмалъулей С. А. Тиханкина, Дагъистан Республикаялъул миллияб политикаялъул ва диназул ишазул министр Э. С. Муслимов, РФялъул ва ДРялъул мустахIикъав юрист, РФялъул Конституциялъулаб судалъул судья ХI. ГI. ХIажиев ва гIемерал цогидал жамгIиял ва политикиял хIаракатчагIи.
Жиндирго кIалъаялда генерал-лейтенант А. П. Афанасьевас бицана жиндирго начальникасул фронтовикасул хIакъалъулъ, РФялъул Оборонаялъул министерствоялъул Рагъулаб институт лъугIаразул цIаралдасан кIалъазе вахъана Е. Л. Логинов. Гьес абуна КъватIисел улкабазул рагъулаб институталъул музеялда, цIар рагIарав генераласул гIумру бихьизабулеб бокIон рагьизе кколилан.
М. Танкаевасул яс Ольгаца, ясалъул вас Тимур Гутиевас данделъиялда гIахьаллъаразе, гьеб тадбир гIуцIаразе баркала кьуна. М. Танкаевасул цIаралда бугеб ракIалдещвеялъул медаль къватIибе биччан буго, гьеб шапакъат кьуна гьеб тадбиралъул цо-цо гIахьалчагIазеги.
