Дагьал церегIан къоязда Расул ХIамзатовасул цIаралда бугеб Миллияб библиотекаялда тIобитIана интернеталдасан терроризм тIибитIизабиялде информациялъулаб дандечIеялъул суалазда тIасан семинар. Данделъи рагьулаго, ДРялъул информациялъул ва печаталъул министр ГIумаргIусман ХIажиевас бицана интернеталдасан терроризмалъул пикраби тIиритIизариялде данде гьабулеб хIалтIул гIолеб гIелалъе ва улкаялъул букIинеселъе бугеб кIваралъул хIакъалъулъ.
Данделъиялда гIахьаллъана «Дагъистан» РИАялъул директор МухIамад МухIамадов, ДРялъул бетIерасда цебе гIуцIараб жамгIият цебетIезабиялъул ва инсанасул ихтиярал цIуниялъул Советалъул председатель Зикрула Ильясов, ДГУялъул доцент, АТКялда цебе бугеб экспертлъиялъулаб советалъул вакил ХIажи Малучиев, Дагъистаналъул Динияб идараялъул вакил МухIамад Дадаев, психологиял гIелмабазул доктор, ДГПУялъул профессор Анжелика Цахаева, ДГУялъул психологиялъул ва философиялъул факультеталъул профессор МустIафа Билалов, бакIалъулал гIуцIабазда хIалтIулел терроризмалде данде къеркьеялъул комиссиялъул (АТК) вакилзаби, СМИязул нухмалъулел ва цогидалги.
«Дагъистан» РГВКялъ бихьизабуна ургъичIого мекъаб иш гьабурай гIадатияй дагъистаниялъул хIакъалъулъ хIадурараб социалияб ролик. Дагъистаналъул Динияб идараялъул вакил МухIамад Дадаевас бицана гIадамазул гIакълу «виртуалияблъун» лъугьин ва гьелдаса бугеб хIинкъиялъул хIакъалъулъ.
«ИКЦ» ГБУялъул нухмалъулев Мухтар ГIамировас СМИялъул информациялъулаб хIалтIи хIасил кьолеблъун лъугьинабизе рес кьолел къагIидабазул ва технологиязул хIакъалъулъ бицун гьабуна доклад.
