Коронавирусгун къеркьолаго, жакъа гIадатияб гуреб ахIвал—хIалалда ругониги, гIумру гьоркьоса къотIичIого цебе унеб буго. Унтиялдаса цIунизе гIадамаз цIуни—къай гьабулеб бугеб куцалъухъ балагьизе иргадулаб халгьабиялде росабалъе унев Гъуниб районалъул бетIер МудунхIажи Къадировгун цадахъ нижецаги гьенибе сапар бухьана. Ниж щварал СалтIа, СилтIа росабазул школазда, медицинаялъул идарабазда, администрациязда ва годекIабахъ унтиялдаса цIуниялъе гIадамаз гьабулеб бугеб цIуна—къаялдаса районалъул бетIер разиго хутIана. Гьев гIенеккана гIадамазул гIарзазухъ ва рагIи кьуна кумек гьабизе. Жакъа районалда бугеб ахIвал—хIалалъул, тарихалде унеб бугеб 2020 соналъ гьарун бажарарал хIалтIабазул ва церечIарал масъалабазул бицун, сапаралдаса руссарал нижеца гара—чIвари гьабуна Гъуниб районалъул бетIер, хIалхьиялда вугев юстициялъул подполковник МудунхIажи Къадировасулгун:
-МудунхIажи, тарихалде унеб буго 2020 сон. Кинаб гьеб букIараб, районалъул гIадамазе щиб лъикIаб жо гьелъ босун бачIараб?
— 2020 сон нижее бигьаяб букIинчIо, амма гьеб нижеца лъугIизабуна лъикIал хIасилалгун. РакIчIун абизе бегьула: Гъуниб районалъул цебетIей гьоркьоса къотIулеб гьечIо.
ЛъикIал хIасилал ккола тIалъиялъул киналго идараби цадахъ рекъон хIалтIулел ругони ва жамгIиял идарабазги районалъул гIумруялъулъ жигараб гIахьаллъи гьабулеб бугони. Гьеб рахъалъ бокьун буго баркала кьезе райсобраниялъул депутатазе, чIахIияб гIелалъе. Гьезул малъа-хъвайги ва сундулъго гьабулеб кумекги дир ишалъе цIакъ пайдаяб ккола.
-Гьаб хъулухъалда мун вугеб кIиго соналда жаниб районалъе пайдаял кинал хIалтIаби гьарун бажарараб?
— Районалда бугеб 26 школалъул 17-ялъе гьабуна капиталияб ремонт. ТIадеялъул байбихьула хIинкъи бугеб хIалалде ккарал школазул бакIазда цIиял раялъул федералияб программа хIалтIизе. Гьелъул кумекалдалъул нижеца, ремонт гьабизе бегьулареб хIалалда басралъараб школазул бакIалда, базе ккола ичIго цIияб школа. Гьезие рихьизаруна ракьал, хIадурана проекталъулабгун сметаялъул документация. Исана февралалда бухIана КIуяда росдал школа, бачIунеб соналда гьенибги цIияб школа бан бахъине ккола.
ЗахIматаб масъала ккола Гъуниб росдал гIадамазе лъим гIоларого букIин. Гьеб росдал цо авалалде лъим машинабаз баччула. Гъуниб лъел мухъ къачIалеб буго. Хьул буго бачIунеб соналъ гъунисезул лъел масъала тIубазе кIвелин абураб. Гьединабго масъала буго цогидал росабалъги.
ХIадур гьабулеб буго Гъунибе, Ругъжабе, ХIутнибе, Хьиндахъе, ХIотIочIибе ва Гъоркьияб КIогьорибе лъим бачиналъе проекталъулабгун сметаялъул документация.
Райадминистрациялда аскIобго буго 1932 соналда бараб, басралъараб лъималазул ах. Гьебги биххун, цIияб ясли баялъе документация хIадурана. ТIадеялъул гьебги бан бахъине ккола. Капиталияб къагIидаялъ къачIана 2012 соналда бараб КIуяда росулъ ясли-ах.
Гъуниб, ХIотIочI росабалъ рана футболалъул майданал. Хъил тIуна СалтIа росулъе унеб шагьранухлул микьго километралъул манзилалда. РакIалда буго Ругъжаб ва ХIотIочI- Хьиндахъ росабалъе щвезегIан нухазде хъил тIезе. Капиталияб ремонт гьабуна Гъуниб ва БацIада росабазул спортзалазда. Гьединго районалъул 25 росулъе унел шагьранухал цIи гьарун къачIана.
Республикаялъул хIукуматалдаса гIарацги тIалаб гьабун, проекталъулал хIалтIаби унел руго Гъуниб росдада тIад бугеб «Кьижарай бахIарай» абулеб кьурул гIус щула гьабиялда.
Капиталияб ремонтги гьабун, культураялъул кIалгIаби рагьана Гъуниб ва Ругъжаб росабалъ. Исана капремонт гьабуна БацIада, Къорода, СилтIа, ГIобохъ, МохIоб росабазул школазда.
Районалъул росабалъ гьабуна анлъго парк. Масала, гъоркьиса республикаялъул росабазул парказда гьоркьоб тIобитIараб къецалда Хьиндахъ росдал паркалъе щвана тIоцебесеб бакI.
-БачIунеб соналъ гьаризе кинал хIалтIаби нужеца тIаде росун ругел?
— Гъуниб росдал 80 проценталъ басралъараб ясли-ахалъул минаялъул бакIалда чара гьечIого цIияб мина базе буго. Гьединго цIияб мина базе ккола КIуяда росдал бухIараб школалъул бакIалдаги.
Дагъэнергоялъулгун гьабураб къотIи-къаялда рекъон, январалдаса байбихьизе буго Гъуниб районалъул токалъул мухъазда капиталияб ремонт гьабиялъул хIалтIаби. Хисизе руго трансформаторал, хIубал ва кварал. БачIунеб соналъ районалъул росабалъе газ бачиналъул карта бахъун буго, цIех-рехал унел руго, кватIичIого хIалтIабазде байбихьила. ТIоцебе газ щвезе буго СалтIа, СилтIа ва Кудали росабалъе, хадуб районалъул киналго росабалъеги.
-МугIрузул районазда гьоркьоб Гъуниб район кидаго букIана лъай кьеялъул рахъалъ цебесеб кьерда. Цогидал районазул школазги пайда босулаан нужер районалъул гIемерисел школазул хIалтIул хIалбихьиялдаса. Лъай кьеялъул иш гьебго даражаялда цIуниялъе районалда щиб гьабулеб бугеб?
— Гъуниб, Сугъралъ, СалтIа, Къорода, КIогьори ва ЧIохъ-Коммуна росабазул школазда цIунун буго лъай кьеялъул ва цIалиялъул цебесебго даража. Масала, гъоркьиса Гъуниб росдал школа лъугIун унев щуго чияс босана меседил медаль. Гьеб школалъул тарихалда меседил медаль щун буго 145 чиясе. Жакъаги нижер школазул цIалдохъабазул лъайги гIадлуги лъикIаб даражаялда буго. Гьез, Дагъистаналъул лъикIал школазул цIалдохъабазулгун къец бан, республикаялда тIоритIулел предметиял олимпиадабазда кидаго призалъулал бакIал росула. «Президентлъун дун вукIарабани» абураб республикаялда тIобитIараб къецалда ЧIохъ-Коммуна росдал школалъул цIалдохъаналъ босана тIоцебесеб ва Санкт-Петербургалда тIобитIараб гьединабго къецалда — призалъулаб бакI.
ЕГЭялъул хIасилазги ниж рази гьаруна.
Нижер школазул учительзабазул лъай-махщалил бицунеб цо мисал бачина. Республикаялда тIобитIараб «ЛъагIалил учитель» къецалда Ругъжаб школалъул авар мацIалъул учительницаялъ тIоцебесеб ва Россиялда тIобитIараб гьединабго къецалда — призалъулаб бакI босана.
ГIалимзабиги гIакъилзабиги нижер гIунги тIокI руго. Дагъистаналъул ва тIолабго Россиялъул батIи-батIиял идарабазда хIалтIулев вуго Гъуниб районалдаса 400-ялдаса цIикIкIун гIелмабазул доктор ва кандидат.
-Районалда кин гIуцIун бугеб гIадамазе медицинаялъул хъулухъ гьабиялъул хIалтIи. Коронавирусалда данде къеркьеялъул хIалтIи кин бугеб?
— Коронавирусалъул ахIи-хIур бахъарабго, Дагъистаналда тIоцебе нижеца районалде нух къана. Гьелдалъун районалда цIакъ дагьал гурони гIадамалги унтичIо. Унти багъарараб мехалда райбольницаялда вукIана 31 чи, гьениб къваригIани рукIине, тIадеги 30 койка чIезабун буго. Жакъа районалъул больницаялда вегун вуго, гьеб унтиялда щаклъи бугев 9 чи, гьезул цо чиясул гурони ковид батичIо. Тохтурзабигун цадахъ, щибаб росулъе щун, нижер администрациялъул хIалтIухъабаз гIадамазда бичIчIизабула гьеб унтул бугеб хIинкъи ва цIуна-къай гьабизе кколеб къагIида.
Компьютерияб томограф къваригIун бугин абун, республикаялъул бетIерасухъе хитIаб гьабидал, анкьго къоялдасан гьеб райбольницаялде битIун бачIана, заманалдасан бачIана 19 ксероксги.
Пандемиялъул ахIи-хIуралъул заманалда нижеца больницаялда гIураб къадаралда чIезаруна къваригIунел дараби, препаратал, гьединго «красная зонаялда» хIалтIулел медицинаялъул хIалтIухъабазе Дагъистаналда бищун цебе кьуна харжалде тIаде бихьизабураб гIарац.
Коронавирусгун къеркьеялъе нижее кумек гьабуна ресалда ругел районцоязги. Масала, ДРялъул Пачалихъияв секретарь Хизри Абакаровас рачIана гIемерал кванил нигIматал, ИВЛ-аппаратал, койкаби, Ругъжаса ГIамирица, МохIоса МухIамад ЧIалдаевас гьабуна кIудияб кумек.
-Жакъа унтараб суал ккола мугIрузул районазда росдал магIишат нахъе кколеб букIин. Инвалидлъиги гьабун, гIадамал хIалтIудаса нахъе кIанцIун руго. Нужер гIадамазде бахун бугищ гьеб «унти»?
— Дун тIоцеве гьаб хъулухъалде вачIиндал, районалъул МТСалъул балансалда букIинчIо цониги белцин. Лизингалъул гIарацги кьун, 2019 соналда босана кIиго комбайн. Жидерго проценталги рецIун, Гъизляралъул зонаялъул хъутабазда хIалтIабиги гьарун, Ставрополь краялде щвезегIан ижараялдаги хIалтIун, гьебго соналъ гьез районалъул бюджеталде рехун бачIана 300 азарго гъурущ.
Жакъа районалда чIаголъиялда буго 14 СПК, 111 фермерлъиялъул ва 7851 жалго бетIергьанал чагIазул магIишатал. Дагъистаналдаго цIар ун буго тайпадулаб гIи гIезабулел «Сугъралъ» ва «Милюб» СПКязул, гьединго «ЧIохъ» агрофирмаялъул. Гъоркьиса Астраханалда тIобитIараб Россиялъул росдал магIишаталъул выставкаялда «Сугъралъ» ва «Милюб» СПКязул куйдузе кьуна меседил медалал.
Гъизляралъул зонаялда ругел нижер магIишатазул хъутабазда гIемерисез гIезабула пиринчI ва могьолал культураби.
Киналго магIишатазда дандекъан, жакъа районалда буго 3913 чIегIерхIайван ва 58438-гIанасеб гIи- цIцIани. Квеш бугеб жо ккола соналдаса соналде районалда гIи-боцIул къадар дагьлъулеб букIин.
Ахал хIалтIизарун гурони, ракь бекьулел росаби къанагIат руго. Цогидазе мисаллъун букIине дица бегана нижерго умумузул ракь, ният буго гьениб кIудияб ах гIезабизе.
-ТIабигIиял ва тарихиял памятниказ бечедаб букIиналъги батила, къватIисел ва жанисел туристазе цIакъ бокьула Гъуниб районалде щвезе. Районалда туризм цебетIезабиялъе хIалтIи кин гIуцIун бугеб?
— Гъуниб районалъул ракьалда буго республикаялъул ва федералияб кIваралъул лъабнусгоялдасаги цIикIкIун памятник.
Советияб заманалда гьаниб хIалтIулеб букIана «Орлиное гнездо» абулеб санаторий. РачIунел туристазул къадарги, жакъа гIадин, цIикIкIараб букIинчIо. 2020 соналда районалде вачIун вуго 55-60 азарго турист. Гъуниб мегIер, Гъамсукь росу, СалтIа чваххи, Къорода бецIкъварилъи, ЧIохъ ва Сугъралъ росаби, ай туристазда бихьизе жо гьаниб цIакъ гIемер буго. ХIалтIулел руго Гъуниб магIарда бугеб «Орлиное гнездо» санаторий, пансионат «Радде» ва гIемерал гьалбадерил рукъзал.
ДРялъул Туризмалъул министерствогун цадахъ нижеца гIуцIана районалда туризм цебетIезабиялъул хасаб план. Киса-кирго лъуна гIурус ва ингилис мацIазда хъварал «Туристические навигации» абулел халкъазда гьоркьосеб тайпаялъул игIланал.
Дир пикруялда, районалъул ракьалда ругел памятниказдаса бищунго къиматаб ва тарихияб ккола Гъуниб хъала. Гьелъие кьучI лъун буго 1862 соналда. Хъалаялда жаниб буго тIубараб тарихияб комплекс. 150 соналъ цебе бараб, амма цониги нухалъ жиб букIараб куцалъ къачIачIеб, ай биххун иналда хIинкъи бугеб «Шамилил хъала» абулеб федералияб бетIергьанлъиялъул тарихияб памятник Россиялъул Культураялъул министерствоялъул балансалда буго. Гьезулгун бухьенги гьабун, хъала цIи гьабун къачIаялъе тадбирал гьарулел руго. Гьелдаго цадахъ хIалбихьулеб буго ЮНЕСКОялъул сияхIалде Гъуниб хъала босизабиялъеги.
Чара гьечIеблъун ккола Гъамсукь росулъе шагьранух гьаби, гьединго СалтIа чваххукье ва Къорода бецIкъварилъиялда жанире иналъе лъикIал шартIал гIуцIи. БачIунеб соналда Гъуниб, СалтIа, НакIкIазухъ рагьизе руго цIиял туркомплексал.
-Районазул бутIрузул гIарз букIуна кьищни баччиялъул масъала тIубазе захIмалъулеб бугин. Нужеца кин гьеб тIубазабулеб бугеб?
— Республикаялда буго кьищни баччулеб ункъо регионалияб оператор. КъотIи-къайги гьабун, гьез кисанго кьищни баччизе кколаан. Амма… Нижерги букIана «Дагъэкодом» абулеб идара, амма, кколеб куцалда, гьелъ нижер кьищни баччичIо. Гьелъул директор хIалтIудаса вахъана. ЦIияв директорас, КIуядаса АхIмадица, байбихьун буго жигаралда хIалтIи гIуцIизе. Жакъа нижеца кьищни баччула Хважалмахьи росулъ бугеб заманалъулаб полигоналде. Планалда буго, печалги росун, гьанибго кьищни бухIизе.
-ГIатIиракьазде гIадамалги гочун, росаби чIороголъулел руго. Росабалъго гIадамал чIезариялъе нужеца щиб гьабулеб бугеб?
— Гьеб унти нижер росабалъеги щун буго. Киналго цIаларал чагIазени киб гурин, гIадатиял гIадамазецин росабалъ хIалтIи гьечIолъи, гьединго бигьаяб гIумру гьабизе бокьи ккола гьелъие бугеб аслияб гIилла. Нижер районалдаса цIикIкIараб къадаралда гIадамал къватIире гочун унел ругин абиларо. Масала, ХIутни, ХIотIочI-Хьиндахъ росабалъа гIадамал къватIире унаро.
-Кин тIубазабулеб бугеб гIолилазе хIалтIи чIезабиялъул ва гьезие хIухьбахъиялъе шартIал гIуцIиялъул суал?
— ГIолилазе хIалтIи чIезаби ккола бищунго унтараб масъала. Районалда цIикIкIунеб буго хIалтIи гьечIел гIолилазул къадар. Гьединлъидал цIалун рахъарал гIолилал районалде тIад руссунел гьечIо, хIалтIизе гьунар-махщел бугел чагIиги шагьаразде гочунел руго. Росабалъ хутIулел руго херал чагIи. Жакъа росабалъ чIара-хьараб гIумру гьабиялъе квербакъула гIадамазул жалго бетIергьанал магIишатаз. ГIолилазе бокьулеб гьечIо мукъсанаб гурони хайир кьолареб захIматаб хIалтIи гьабизе.
Районалда руго культураялъул, творчествоялъул клубал ва хIухьбахъиялъул централ. Эркенаб заманалда гIолилаз пайдаяб хIухьбахъи тIобитIиялъе нижеца щибаб росулъ рагьулел руго спортивиял залал ва майданал. Гьенир гIуцIулел руго батIи-батIиял спортивиял секциял. Чара гьечIеблъун ккола райцентралда гьаб заманалъул кIудияб спорт- комплекс бай. Гьединго къачIалел руго культураялъул кIалгIаби, цIи гьабулеб буго гьезул хIалтIи. Бокьулеб хIалтIи бугони, гIолилал росабалъа къватIире унаро. Ниж гьеб масъалаялда тIад хIалтIулел руго.
-Кинал рагIабаздалъун районцоязда баркилеб тIаде щолеб бугеб цIияб 2021 сон, щиб гьезие гьарилеб?
— Киназдаго ракI-ракIалъ баркула тIаде щолеб цIияб сон. Районалъул халкъалъе дица гьарила сундулъго битIккей, щулияб сахлъи, бечедаб ва ракълилаб гIумру, мурадал тIурай. Биччанте унеб соналдаса бачIунеб сон нилъее бечедаб, талихIаб ва рохалилаб букIине. Биччанте 2021 соналда Аллагьас нилъедаса коронавирусалъул балагь тIаса босизе.