FaceBook  in  yt  rss

11

ГIалимчIужуялъул хIакъалъулъ

Студентазул эбел, ишцоязул яц


Мадинал хIурмат гьабула гьей гъваридаб лъаялъул, хIеренаб каламалъул, ритIухъай гIадан йикIиналъ

Загьид ХIаживас хъвараб кочIолъ ругел «ЙорчIа, магIарулай, гIелин кьижарай» абурал рагIабаз магIарул чIужугIадан ахIулей йиго цIияб гIумру гIуцIизе, лъавукълъигун къеркьезе, жамгIияб гIумруялъулъ гIахьаллъизе. Гьеб ахIи гIадахъги босун, жакъа гIемерал руччаби рахун руго гIелмуялъул, искусствоялъул, спорталъул борхалъуде. Гьединазул цояй, ай гIелмуялъул кIудияб борхалъуде яхарай гIадан ккола Болъихъ районалъул Зило росулъа Мадина МухIамадоваги. ТIаде щвараб руччабазул къоги баркулаго, бокьун буго цIалдолезе гьелъул хIакъалъулъги бицине.

Мадина гьаюна ва гIуна Буйнакскалда. ЗахIматго унтарав эмен тохтурзабаз хвасар гьавидал, Мадинаца ният гьабуна тохтурлъун яхъине. Гьеб анищ гIумруялде бахъинабиялъул мурадалда, школа лъугIун хадуй, цIализе лъугьана Буйнакскалъул медучилищеялде. Училище лъугIараб 1995 соналдаго цIализе лъугьана ДГМАялъул педиатрияб факультеталде. ЦIалулеб заманалда Мадина йикIана студенткаги, гIодоркъоязда - Буйнакскалъул туберкулезалда данде къеркьолеб диспансералда хIалтIулей дежурнияй медсестраги. ЦIалул отличница гурейги, гьей йикIана физиологиялъул ва лъималазул унтабазул кафедрабазул студентазул гIелмиял кружоказул жигарай членги. БатIи-батIиял темабазда докладалгун цееяхъунаан студентазул гIелмиял конференциязда. БагIараб дипломалда академия лъугIараб 2001 соналда, ДГМАя-лъул ГIелмияб советалъ Мадина йихьизаюна аспирантураялде цIализе йитIизе, къотIиги гьабуна, гьеб лъугIидал, академиялде хIалтIизе ячIине. Аспирантура лъугIидал, ДГМАялъул ректор ГIабдурахIман ГIусмановас гIолохъанай медицинаялъул гIелмабазул кандидат преподавательлъун хIалтIизе йосана. Гьелдаго цадахъ 2002 соналдаса нахъе гьей хIалтIана «Гиппократ» абураб сахгьариялъулгун унти чIезабиялъул централда тохтур- дерматокосметологлъун, гьенибго анцIго соналъ бачана дерматокосметологиялъул курсги. 2013-2016 соназда хIалтIана факультеталъул деканасул заместительлъун. Гьелъул жавабчилъиялда гъоркь букIана педиатрияб факультетги. Жакъа Мадина МухIамадова ккола ДГМУялъул гIаммабгун биохимиялъул кафедраялъул доцент, гIелмияйгун педагогикияй хIалтIухъан.
Гьелъ тIобитIараб «Физиолого-биохимические особенности роста и развития детей Дагестана в зависимости от климатических и географических условий» абураб кIудияб кIваралъул гIелмияб цIех-рехалъухъ ректорас гьелъие кьуна гIарцулаб премияги, цIикIкIинабуна харжги. Гьелъул гIелмиял хIалтIабазул хIакъалъулъ макъалаби рахъана Азербайжаналъул, Польшаялъул, Германиялъул, Франциялъул ва Россиялъул гIелмиял журналазда. 2017 соналда къватIибе бачIана, ВУЗазул студентазе чара гьечIого къваригIунеб «Биохимия крови» абулеб гьелъул цIалул тIехьги. Басмаялда бахъизе хIадурулеб буго лечебнияб, педиатрияб ва медико-профилактияб факультетазул кIиабилел курсазул студентазе чара гьечIого къваригIунеб «Биохимия соединительной ткани» абулеб цIалул тIехьги.
Преподаватель гурейги, жакъа гьей ккола ДРялъул ЖамгIияб палатаялъул ва ОНФялъул экспертги, гьединго генерал-полковник МухIамад Танкаевасул цIаралда бугеб гIолилазе ватIан бокьиялъулаб тарбиякьеялъул фондалъул правлениялъул ва «Биологический вестник» журналалъул редколлегиялъул членги. Гьелъул жигаралдалъун щибаб соналъ МахIачхъалаялъул школа-интернатазда тIоритIула гурхIел-рахIмуялъулал акциялги.
РакIбацIцIадаб хIалтIуе гIоло Мадина МухIамадова мустахIикълъана гIемерал шапакъатазе, гьездаго гьоркьор руго РФялъул ва ДРялъул ХIурматалъул грамотаби, дипломал, баркалаялъул кагътал ва гIарцулал премиял.
Мадинал буго талихIаб, цоцалъ гъункараб ва захIмат бокьулеб хъизан. Гьей чIухIула жиндирго лъималазул бергьенлъабаздасаги. Вас Ибрагьимица щуйил къиматазда лъугIизабуна кадетазул школа, бергьенлъиялда цIалулев вуго медколледжалда. ДГМУялде щай вас лъугьинавичIевин цIехедал, гьелъ абуна: «Дие бокьула лъайкьеялъул кIиго система: тIоцебесеб - гьоркьохъеб, кIиабилеб - тIадегIанаб. Дунго гьедин цIалиялъулги лъикIаб хIасил ккана. Яс-Диана школалда цIалулей йиго, гьелъиеги бокьун буго тохтурлъун яхъине». Мадинаца абуна лъималазе битIараб тарбия кьеялда ва гьезул хасият-гIамал куцаялда кIудияб бакI кколила художествиял тIахьаз. ГIумруялда жаниб Мадинал лъугьун гьечIо кинабгIаги ракIбухIизесеб гIунгутIи, гьелъ киданиги бицунаро инсанасул ракI лъукъулеб рагIи. Гьелъги батила, гьудуллъи гьабулеб ракI рагьарал, рагIи кколел, хIила-рекIкI гьечIел гIадатиял гIадамазулгун. Ишцояз ва студентаз Мадина ГIалиасхIабовна рикIкIуна мисалияй преподавательлъун ва лъикIай насихIатчIужулъун. Гьелъ студентазе кумек гьабула гIумруялда жаниб жидерго бакI батизе, бокьулеб иш гъваридго лъазабизе ва тIасабищараб махщалил унго-унгояв специалист вахъине. Сундухъ нужее гьадигIан цIакъ Мадина ГIалиасхIабовна йокьулей абураб суалалъе студентазул батIи-батIиял жавабал рукIана. Гьел цойиде рачани, студентазе Мадина йокьулей йиго гьелъул гъваридаб лъаялъухъ, хIеренлъиялъухъ, ритIухълъиялъухъ, агъаз бугей йикIиналъухъ.
ДГМУялъул лечебнияб факультеталъул кIиабилеб курсалъул студентазги гьарана жидер йокьулей мугIалималда газеталдасан гьал рагIабаздалъун байрам баркейилан:
«ХIурматияй Мадина ГIали-асхIабовна, изну кье нижее дуда баркизе ихдалил байрам, гьаризе дуе хIалтIуде гъира-жан, гьунара-лъулаб йоржин, дур студентазул бергьенлъабаздаса чIухIи, бакъуца къалъараб их ва талихI дуе. Нижеца дур къимат гьабула. Биччанте дур рокъоб кидаго ханлъи гьабизе парахалъиялъ ва рес буголъиялъ, рекIелъ – лъикIлъиялъ ва рокьиялъ. Биччанте дуца нижее кьолеб рокьи ва хинлъи лъабго нухалъ цIикIкIун духъего тIадбуссинеги».
РахIим НурмухIамадов

Прочитано 98 раз Последнее изменение Понедельник, 11 марта 2019 15:07
Другие материалы в этой категории: « Цо чиясухъаги бажарула ГIелму ва гIадамал »

Оставить комментарий

Убедитесь, что Вы ввели всю требуемую информацию, в поля, помеченные звёздочкой (*). HTML код не допустим.

 

ХIакъикъаТ 

Республиканская общественно-политическая газета на аварском языке.

 

Руководитель-главный редактор:

Камалов Али Ахмедович

_____________________________

 

f1  in1  yt1  rss1

_____________________________

 

Рейтинг@Mail.ru

Яндекс.Метрика

 

Фото

Настройка сайта

Цвет темы

Cyan Red Green Oranges Teal

Макет

Шир. Рам. Обрамл. Округл.
Изменение фонового рисунка
Вверх