14 азарго дагъистанияс борхана хIеж

«Дагъистан» РИАялда тIобитIана хIежалъул компанияз хIалтIул хIасил гьабураб данделъи

Журналистазул суалазе жавабал кьуна республикаялъул Диниял идарабазулгун бухьенал гьариялъул комитеталъул председателасул заместитель Расул ХIажиевас ва «Марва-тур» ОООялъул генералияв директор Булат Къурбановас.
Исана, квотаялда рекъон, хIеж борхана 9600 дагъистанияс. ГIаммаб къагIидаялда босани — 14 азарго чияс. ХIежалде гIадамал ине байбихьана 1 августалда, тIадруссун рачIана 8 сентябралда. Амма цо-цояз жидеего гьарулел захIмалъабазул хIакъалъулъги бицана гьез.
— Масала, цIикIкIараб ригьалъул хараби унел руго хирияб ракьалда хвезейилан. Яги лъимаде ругел руччаби унел руго хирияб ракьалда лъимер гьабизейилан. Щай бичIчIулареб гьезда жидецаго жидеего гIакъуба кьолеб букIин, — ан абуна гьез.
Исана хIежалда цо гIолохъанчиги хун вуго. Гьев вукъун вуго Маккаялда.
Гьединго данделъиялда бицана хIажизаби-налъулазул, коммуналиял хъулухъазухъ, яги налогал, ялъуни алиментал кьечIого таразул хIакъалъулъги.
— ЛъикIаб букIинаан гьединазул хIакъалъулъ, хIежалде роржине заман щвараб мехалда гуреб, цо моцIалъгIаги цебе лъазабулебани, — ян абуна данделъиялъул гIахьалчагIаз.