Июль моцIалда бищунго лъикIав гугарухъанлъун рикIкIана МухIамад КъурбангIалиев
Июлалъул байбихьуда Сочиялда букIараб эркенаб гугариялъул рахъалъ Россиялъул чемпионаталда лъикIал хIасилал рихьизаруна Дагъистаналъул тIасабищараб командаялъ. АнцIго цIайиялъул категориялда гьоркьоса анлъгоялда тIоцебесеб бакI босана гьениб нилъер спортсменаз — Рамиз ХIамзатовас (57 кг), МухIамадрасул Идрисовас (61 кг), ХIажимурад Рашидовас (65 кг), МухIамад КъурбангIалиевас (74 кг), ХIажи Набиевас (79 кг) ва ГIалихан ЖабрагIиловас (92 кг).
Гьезул щивас Сочиялда бихьизабуна берцинаб ва къуватаб гугари. Амма социалиял гьиназда гьабураб цIех-рехалъул хIасилазда ва wrestdag.ru сайталъул экспертазул пикруялда рекъон, июль моцIалъул бищунго лъикIав гугарухъанлъун ккана МухIамад КъурбангIалиев. Шамил Рашидовасул нухмалъиялда гъоркь ругьун гьавулев МухIамад Россиялъул чемпионаталда бергьана 74 кг цIайиялда бищунго къуватал гугарухъабаздаса. Мисалалъе, гьес къезаруна дунялалъул чемпионал Хетаг Цаболовгун МухIамадрасул ГъазимухIамадов, дунялалъул первенствоялъул финалист АхIмад ГIусманов ва гIолилазда гьоркьов Европаялъул чемпион Никита Сучков.
Гьелдалъун МухIамад КъурбангIалиев ана 74 кг цIайиялда 2019 соналда эркенаб гугариялъул рахъалъ дунялалъул чемпионаталда гIахьаллъизе бегьулел гугарухъабазул сияхIалде. Гьеб цIайи МухIамадие ккола цIияблъун. ГьанжелъизегIан гьев цевевахъунев вукIана 70 кг цIайиялда.
