Хадусеб сезоналда «Анжиялъ» миллияб лигаялъул командаби къабул гьаризе руго «Динамо» стадионалда

Футболалъул рахъалъ Россиялъул чемпионаталъул 2018-2019 соназул сезоналъул 29-абилеб туралда, МахIачхъалаялъул «Анжи» Казаналда дандчIвана бакIалъулаб «Рубин» командагун. Кинаб хIасил гьеб хIаялъул кканиги, премьер-лигаялда хутIиялдаса «Анжи» махIрумлъана. Гьединлъидал, гIицIго къотIи-къаялда рекъон, 30 туралда гIахьаллъизе кколеб букIин гурого, гьеб хIаялдаса махIачхъалаялъулазе щибго пайда букIинчIо. Гьелъги батила, «Рубиналъулгун» хIаялъул хIасил бащадаб кканиги (0:0), бихьулеб букIана «Анжиялъул» футболистаз торгIо гъира гьечIого хIалеб букIин.

БатIи-батIиял информациялъул алатаздасан «Анжиялъул» финансовияб ахIвал-хIал лъикIаб гьечIин рагIарав ва чанго соналъ цебе гьелъул мухъилъ хIалев вукIарав футболист Роберто Карлосица лъазабуна жив командаялъе кумек гьабизе хIадурав вугин. «РакI гурхIараб хIалалде ккун буго МахIачхъалаялъул команда. Сулейман Керимовасул квербакъиялдалъун дунялалдаго машгьурлъараб команда гьедин рехун тезе бегьиларо. «Анжиялъ» кумек тIалаб гьабулеб бугони, дун кидаго хIадурав вуго бажарараб гьабизе», -ян хъвалеб буго Роберто Карлосица.
МахIачхъалаялъул ко­ман­даялъул президент ГIу­с­ман Къадиевас лъазабуна «Анжи» хадубккунги, про­фессионалияб команда хIисабалда, РФСалъ тIо­ритIулел батIи-батIиял тур­ни­разда гIахьаллъизе бугин.
«Дун гьал къоязда щвана Россиялъул футбола­лъул союзалъул нухмалъулев Алек­сандр Дюковасухъе ва бицана «Анжиялъул» бу­кIи­неселъул. Гьес рагIи кьу­на хадусеб сезоналде, ай 2019-2020 соназул сезоналде командаялъе лицензия щвеялъе кумек гьабизе. Россиялъул чемпионата­лъу­л миллияб лигаялда, ай тIоцебесеб лигаялда хIазе ккани хIажалъулеб сурсат балагьизе ккола ва хьул буго къокъаб заманалда жаниб командаялъе спон­сорал щве­лин. Анжи-аренаялда даран-базара­лъулгун хIухь­бахъиялъул центр гьабизе бугин рагIана. Хадусеб сезоналда махIачхъалаялъулаз командаби къабул гьаризе руго «Динамо» стадионалда», — ян бицана «Анжиялъул» президентас.
30-абилеб, ай Россия­лъул премьер-лигаялъул ахирисеб туралда «Анжиялъ» Анжи-аренаялда къабул гьа­бизе буго «Урал» команда.