Дагъистаналъул бетIерасул ишал тIуралев Сергей Меликовас шапакъаталгун гIарцулал сайгъатал кьуна Токиоялда тIоритIарал Олимпиялъул ва Паралимпиялъул хIаязул чемпионазегун призеразе.
Республикаялъул нухмалъулесулгун букIараб дандчIваялда гIахьаллъана эркенаб гугариялъул рахъалъ Олимпиялъул чемпион Завур Угуев, мазгарул призер ХIажимурад Рашидов, боксалъул рахъалъ мазгарул призер Земфира МухIамадгIалиева, клаб рехиялъул рахъалъ Паралимпиялъул чемпион Муса Таймазов, паратхеквондоялъул рахъалъ Паралимпиялъул мазгарул призерал Даниил Сидоров, Зайнудин Атаев ва дзюдоялъул рахъалъ Паралимпиялъул мазгарул медалист Анатолий Шевченко.
Эркенаб гугариялъул рахъалъ кватIичIого букIине бугеб дунялалъул чемпионаталда гIахьаллъизе хIадурлъулев вукIиналда бан, Олимпиялъул чемпион ГIабдурашид Садулаев данделъиялда вукIинчIо.
Сергей Меликовас цоги нухалъ баркана спортсменазда Токиоялда щварал бергьенлъаби.
-Нужеца Олимпиялъул ва Паралимпиялъул хIаязда рихьизарурал хIасилал ккола Дагъистаналъул ва тIолабго Россиялъул цадахъал бергьенлъаби. Нуж руго нижер бахIарзал, багьадурзаби. ЗахIмалъабазда тIад малги чIун цевехун ин спортсменасе ккола гIадатияб иш. Амма сакъатал чагIазе кIиго нухалъ захIмат букIуна чемпионлъиялде нух нахъа тезе. Баркала буго нужее киналъухъго, -янги абун, Дагъистаналъул бетIерас Олимпиялъул ва Паралимпиялъул чемпионазе ункъ-ункъ миллионалъул, призеразе кIи-кIи миллионалъул сертификатал кьуна.
Дагъистаналъул спорталъул министр Сажид Сажидовасги баркана спортсменазда бергьенлъаби.
-Нуж ккола гIун бачIунеб гIелалъе мисаллъун. Гьединлъидал, хIаракат бахъе хадубккунги цIарги намус-яхIги цIунизе. Гьарула хадурккунги бергьенлъаби, -ян абуна спорталъул министрас.
