Улкаялъул президент Владимир Путиница Кремлялда къабул гьаруна Токиоялъул Олимпиялъул хIаязул чемпионал. Гьездаго гьоркьор, эркенаб гугариялъул рахъалъ кIицIул Олимпиялъул чемпион ГIабдурашид Садулаевасул цебехъанлъиялда гъоркь, рукIана Дагъистаналдаса атлеталги. Гьезул щивасе Владимир Путиница кьуна шапакъатал. Президентас ГIабдурашид Садулаевасул каранда бана «ХIурматалъул гIаламат» орден, «Гьудуллъиялъул гIаламат» орденазе мустахIикълъана Заур Угуевгун Альберт Батыргъазиев.
Тадбиралда кIалъазе вахъарав ГIабдурашидица улкаялда спорт цебетIеялда сверухъ гьабулеб хIалтIухъ ва гьединго Олимпиялъул тIаса бищараб командаялъе чIезарун ругел лъикIал шартIазухъ Владимир Путиние баркала загьир гьабуна. «Нижер гIемерисезе Олимпиялъул хIаял ккола анищлъун, гьитIинаб къоялдаса нахъе захIмат-гIакъубаги бихьун, дандчIвалел гIемерал квалквалазда тIад малги чIун хIадурлъарал гIумруялъул аслиял къецаллъун. Токиоялда щвараб меседил медалалдаса чIухIун вукIарав дие, Олимпиялъул хIаял къаялъул тадбиралда Россиялъул байрахъги кодоб ккун, улкаялъул тIаса бищараб командаялда цеве вилълъине рес щвей лъугьана бищунго къиматаб лахIзатлъун. Спортивияб рахъалде кьолеб кIваралъухъ, спортсменаздехун бугеб бербалагьиялъухъ цоги нухалъ РФялъул Спорталъул министерствоялъе, Олимпиялъул комитеталъе ва хас гьабун дуе, Владимир Владимирович, нижер киназулго рахъалдаса баркала. Гьединго баркала загьир гьабизе бокьун буго тренеразе, гIагарлъиялъе, рахъкколезе ва гьудул-гьалмагъзабазе. Ниж хIадурал руго гIолеб гIелалъулгун хIалбихьи бикьизе, гьезда лъикIаб-квешалъул бицине. Токиоялда щварал меседил медалаздалъун нижер спортивияб нух лъугIуларо, гьаб буго байбихьи ва хадубккунги ракIалда буго, Россиялъул байрахъги борхатго ккун, цIи-цIиял бергьенлъабазда хадур къватIире рахъине»,-ан абуна ГIабдурашид Садулаевас.
Владимир Путинил кумекчи Игорь Левитиница шапакъатаздалъун кIодо гьаруна Олимпиялъул хIаязул призерал Муслим ХIажимухIамадов (бокс), ХIажимурад Рашидов (эркенаб гагури) ва Зенфира МухIамадгIалиева. Гьезие кьуна «ВатIаналда цере гьарурал хъулухъазе гIоло» орденал.
Хадубго улкаялъул президентас къабул гьаруна Токиоялда Паралимпиялъул хIаязда гIахьаллъарал спортсменалги. Гьезда гьоркьов вукIарав Дагъистаналдаса паралимпиялъул чемпион Муса Таймазовасе Владимир Путиница кьуна «Гьудуллъиялъул гIаламат» орден.
