Жакъа дунялалда бищунго машгьураб спортивияб тайпа ккола фут­бол. Амма ахирал соназда нилъер республикаялда гьелде кьолеб кIвар загIипаб буго. Гьелъие гIилла — финансовияб рахъалъ командабазе ку­мек гьабулел чагIи гьечIеблъи.

 

    Россиялъул чемпионаталъул пре­мьер-лигаялда хIалеб букIараб МахIачхъалаялъул «Анжи» цебе бахъунеб буго профессионалияб ли­гаялда. Гьединабго ахIвал-хIал буго «Легион-Динамо» клубалъулги.

    КIудияб футболалда хIасилал хашал рукIаниги, гIезегIан лъикI цере рахъунел руго сакъатал футболистаздасан гIуцIарал командаби. Мисалалъе, 2020 соналда Дагъиста­налъул канлъукъазул футболалъул тIаса бищараб команда бахъана Рос­сиялъул чемпионлъун.

ЦIияб сезоналде хIадурлъулеб бу­геб рехсараб командаялъул капитан Мурад НурахIмаевас нижее бицана гьеб гIадатияб гуреб футболалъул цо-цо балъголъабазул хIакъалъулъ.

 

   — Мурад, кида гIуцIараб Дагъ­истаналъул канлъукъазул футбо­лалъул тIаса бищараб команда? ГIадатияб футболалдаги гьелдаги гьоркьоб щиб батIалъи бугеб?

 

   — Канлъукъазул Дагъистаналъул тIаса бищараб командаялъе кьучI лъуна гIезегIан цебего, амма официа­лиял турниразда ниж цере рахъунел руго 2007 соналдаса нахъе.

14 соналда жаниб улкаялъул чем­пионатазда лъабго нухалда щвана мазгарул медалал, Сочиялда, Росси­ялъул президент Владимир Путинил призалъе гIоло тIобитIараб турни­ралда мустахIикълъана лъабабилеб бакIалъе ва 2020 соналда Раменское шагьаралда букIараб Россиялъул чемпионаталда щвана меседил меда­лал.

    Нижеца хIалелдаги гIадатияб футболалдаги гьоркьоб цо кIудияб батIалъиго гьечIо, голкипер гIакIаялъулаб майданалдаса къватIиве вачIине бегьунгутIи гуро­ни.

 

   — Черхалъе гъая ккеялда хIинкъи букIунищ нужер?

 

   — БукIунаро. Нижеца хIалеб фут­болалъул тайпа ккола В2/В3. Гьеб категориялъ гъорлъе рачуна беразда канлъи бихьиялъул рахъалъ дагьа- макъаб гурого жагъаллъи гьечIел спортсменал. Гьединлъидалин правилабазда гьоркьобги кIудияб батIалъиго гьечIеб.

 

   — Нужее кумек лъица гьабулеб, бугищ хасаб федерация ялъуни ки­наб бугониги гIуцIи?

 

   — Нижер спорталъул федера­ция Дагъистаналда гьечIо. Буго ТIолгороссиялъул канлъукъазул жамгIият — гьелъул букIуна гIезегIан кумек. Амма, аслияб къагIидаялда, ни­жеда рухI гъола Дагъистаналъул Спорталъул ва физическияб культу­раялъул министерствоялъ. Гьелъул кумекалдалъун тIоритIула респу­бликаялъул даражаялъул турнирал ва Россиялъул чемпионатазде унелъ­улги квербакъи гьабула Дагъистаналъул Спорталъул ва физическияб культураялъул министерствоялъ.

 

   — Футболалъ цогидал ишазде регIизего толищ?

 

   — Канлъукъазул футбол професси­оналияб спортивияб тайпа кколаро. Гьединлъидал нижер щивасул буго жинди-жиндир хIалтIи, хъулухъ, иш. Кидаго футболалде машгъул­лъун рукIунаро, магIишат-яшав гьа­бизе, лъимал-хъизам хьихьизе кко­лелъулха.

 

   — Улкаялъул даражаялда Дагъ­истаналъул рахъалдасан цере рахъунел нужее чIезарурал харжал рукIунищ?

 

   — РукIунаро. Ниж профессионали­ял спортсменал гурелъул, харжалги нижее кьоларо.

 

   — Командаялда цере лъурал масъалаби кинал ругел?

 

   — Тренераз цебе лъураб аслияб масъала ккола исанаги улкаялъул чемпионаллъун рахъин. Гьебин абу­ни нижехъа бажарула. Хьул буго нижер футболистал улкаялъул тIаса бищараб командаялъул мухъилъе ккелинги. ГьабсагIаталда тIадчIун ругьун гьарулел руго.

 

    Газета гьоркобккун баркала кьезе бокьун буго спорт цебетIезабиялда тIад хIалтIулев нижер насихIатчи, гIакълучи ва тренер ХIажимурад Рамазановасе. Хасаб баркала буго ДРялъул Спорталъул ва физически­яб культураялъул министерствоялъ­ул хIалтIухъан Жамал ГIумаровасе. Гьев кидаго нижеда цадахъ вукIуна ва жакъа къоялъ канлъукъазул фут­болалъул рахъалъ ругел бергьен­лъаби ккола гьесул хIаракаталъул хIасиллъун.

 

Темирхан ХIАСАНОВ