ьал къоязда Хабаровск краялдаса туроператоразул анцIгониги къокъаялъул вакилзабаз хIухьбахъи гьабуна нилъер республикаялда – Дербенталда, Дагъогниялда, Хунзахъ, Сулахъ къварилъухъ, ЧIикIаб хIорихъ, Гъуниб районалда.
Гьелъие квербакъи гьабуна гьеб краялда вугев ДРялъул официалияв вакил Бейдулагь ГIисаевас, республикаялъул Миллияб политикаялъулгун диниял ишазул, гьединго Туризмалъулгун халкъиял махщелазул рахъалъ гIуцIараб министерствабаз.
Гьедин бицана 19 октябралда «Дагъистан» РИАялда тIобитIараб пресс-конференциялда. Гьелда гIахьаллъана Бейдулагь ГIисаевги миллияб политикаялъулгун диниял ишазул министрасул заместитель Арсен МахIмудовги.
«Цере Хабаровск краялда гIумру гьабулел гIадамал хIухьбахъизеги бизнесалъул ишазги унаан Китай, Корея, Тайвань гIадал улкабазде. Пандемия байбихьун хадуб гьенибе нухги къан, улкаялда жаниса-гIебеде сапарал гьаризе байбихьана гьез. Гьедин тIаса бищараб буго Дагъистанги. Амма батIи-батIиял харбазда божун, цо-цоял хIинкъана гьанире рачIине», — ян бицана Б. ГIисаевас.
Бизнес-туралъул вакилзаби разиго хутIана тIабигIаталдасаги ракI рагьарал нилъер ракьцояздасаги. Хасго Хунзахъ, ЦIобокь рагIалалъги цогидал бакIазги асир гьарурал гьел чIун рукIун руго чадрахъ сордоги бан, дагьабги мехалъ жал гьанирго теян.
Б. ГIисаевас бицухъе, цебеги жеги ункъо батIияб къокъа бачIун букIун буго Дагъистаналде. Масала, гьесул квербакъиялдалъун гъоркьиса Шамил районалда тIоритIун рукIана Хабаровскиялдаса спортсменазул спортивиял сборал.
Дуца гьалбал Шамил районалдеги, Хунзахъеги, Гъуниреги, ЧIикIаб хIорихъеги рачун ругин, цониги нухалъ мун гьелгун цадахъ дурго Хив районалде щай щвечIевин абун махсаро гьабуна ГIисаевасе пресс-конференциялда табасараназул газеталдаса журналисталъ. РакI-ракIалъ жиндир пикруялъул рахъ ккураб бакIалде анин живин жаваб кьуна гьесги. Гьединго тIаде жубана магIарулал, табасаранал абун, жинца Дагъистаналъул халкъазда гьоркьоб кинабгIаги батIалъи гьабуларинги.
ГIисаевасул рагIабазда рекъон, туристазда гьоркьор рукIине бегьула инвесторлъи гьабизе рес бугел гIадамалги. Гьединлъидал гьес гьаб ахиралда гьабураб сапаралда «Бизнес-тур в Дагестан» абун цIарги лъун букIараб.
«Дир хIисабалда, Хабаровскиялдаса туристазе рекIее гIун батизе ккола этнотуризм, гастротуризм, промышленнияб, стоматологиялъул ва зияратчилъиялъул туризм. Масала, Дагъистаналда цаби-гIусал къачIалел тохтурзабиги лъикIал, багьабиги учузал ругилан, гIезегIан гьалбал рачIунел руго Россиялдаса. Дагъогни шагьаралда бугеб цIер гьабулеб заводалъги асир гьаруна гьел. Щиб лъалеб, гьеб рахъалъ бухьенал гьаризе къасд ккарал гIадамалги ратила туристазда гъорлъ», — абун кIалъана Бейдулагь ГIисаев.
Гьесда ракIалда буго Хабаровскиялдаса МахIачхъалаялде самолетазул рейсал рагьиялъе квербакъизеги. Нилъер аэропорталъул вакилзабазулгун кIалъа-басайги гьабун буго гьес гьал къоязда. Пачалихъалъги кумекги гьабуни, белтил багьа 20-30 азарго гъурщиде букIине бегьулин бицана ГIисаевас.
Гьесул рагIабазда рекъон, Хабаровск краялда гIумру гьабулеб буго щуазарго дагъистанияс. Гьединго рагъулаб хъулухъалдаги вуго нилъер гьаниса кIиазаргониги чи.
Зульфия ХIажиева
