Республикаялда байбихьана инвестициялъулаб проект гIумруялде бахъинабиялъул хIалтIи. 12 гама чIезе санагIатаб портги, 40 миллион консервазул банка къватIибе биччалеб заводги базе буго кватIичIого.
«Каспиялъул маяк» абураб предприятие рагьана республикаялда инвестораз, Каспийскиялъул килькаялъул бачIин цIикIкIинабиялъул мурадгун. ЧчугIил бачIин цIикIкIинабизе ккани, хIажалъана тIадеги цоги портги базе.
«12 гама чIолеб порталда рукIине руго гуми къачIалел бакIал, ккураб ччугIил 30 млн тоннаялъул тадбир гьабулеб бакIги, гьединго, лъагIалие 40 млн банка хIадур гьабулеб консервазул заводги базе буго гьениб аскIобго», — ян бицана хIукуматалъул нухмалъулесул заместитель ГIабдулмуслим ГIабдулмуслимовас.
Гьесул рагIабазда рекъон, цIияб заводалда букIине буго 450 чиясе хIалтIизе бакIги. Гьеб проекталъул багьаги буго 1 млрд. гъурущ.
Аслиял хIалтIулал бакIал рукIине руго Избербаш шагьаралда. Исана июлалда тIабигIиял сурсатазул рахъалъ министр Набиюла Гъарачаевас абун букIана республикаялда кколеб ччугIил къадар лъабго соналдаса 50 000 тоннаялде бахинабизе бугин. ГьедигIанасеб къадаралда ччугIа кколеб букIана республикаялда СССРалъул заманалда.
