Лъабго проект бихьизабуна
15-16 февралалда Сочиялда тIобитIана
Россиялъул инвестициязул форум
Гьелда гIахьаллъана ДРялъул хIукуматалъул председатель Артем Здуновги, ДРялъул хIукуматалъул тIоцевесев министрасул ишал тIуралев Рамазан ГIалиевги, ДРялъул экономикаялъулги территориалияб цебетIеялъулги министр ГIусман Хасбулатовги, ДРялъул предпринимательствоялъулги инвестициязулги агентствоялъул нухмалъулесул ишал тIуралев Башир МухIамадовги.
Форумалда гIахьаллъана РФялъул премьер-министр Дмитрий Медведевги. Гьениб цебелъуна Дагъистаналдаса лъабго инвестициязулаб проект: «Каспийск» ТОСЭР гIуцIиялъулги, «Макьасда» курортги, «Каспий Плаза» абураб гостиницабазул комплекс баялъулги.
Гьел проектал лъун рукIана Россиялъул Кавказалъул ишазул министерствоялъул цолъизабураб стендалда. Гьезухъ балагьизе щвана Артём Здуновги. «Каспийск» ТОСЭР проект гIумруялде бахъинабиялдалъун кьучIдасанго хисизе буго шагьаралъул экономика. Гьениб букIине буго 3000 чиясе хIалтIизе бакI. Шагьаралде бачIине буго 17 млрд гъуруш инвестициязул.
Каспиялъул рагIалда базе буго гостиницаялъулаб комлекс. Гьелда гьоркьобе уна 460 рукъалъул 16 тIала бугеб гостиницаги, ракьулъ жаниб гьабураб автостоянкаги, ательеги, тренажеразул залги, цо чанго бассейнги, ресторанги, клубги, фитнес-СПАги, конференц-залалги, футболалъулги, баскетболалъулги, кIудияб теннисалъулги спортивиял майданалги, катеразул стоянкаги.
«Макьасда» абураб проекталда рекъон, Хунзахъ районалда базе буго курорт. Гьенир гIуцIизе руго гьалбадерие санагIатал шартIал.
Артём Здуновас лъикIаб къимат кьуна форумалда церелъурал Дагъистаналъул фермеразги ва жалго бетIергьанал предприятиязги хIадур гьарурал кванил нигIматазеги.
Артем Здунов гIахьаллъана батIи-батIиял данделъабазда. Гьенирго гьаруна республикаялъул цебетIеялъе кIвар бугел къотIиялги. Масала, ДРялъул предпринимательствоялъулги инвестициязулги агентствоялдаги, Татарстаналъул машинаби ралеб кластералдаги, «ИННОКАМ» абураб «Камскалъул инновациязулаб территориалиябгун производствоялъулаб кластер. Коммерциялъулаб гуреб партнерство» абураб ассоциациялдаги гьоркьоб.
Къойил – цо миллиард гъуруш
Дагъистаналъул цIияб хIукумат гIуцIиялъул хIакъалъулъ бицана
ДРялъул бетIерасул ишал тIуралев Владимир Васильевасул нухмалъиялда гъоркь тIобитIараб данделъиялда гIахьаллъи гьабуна премьер-министр Артем Здуновасги. Гьениб бицана цIияб хIукумат гIуцIизе бугеб къагIидаялъул.
Артем Здуновасул пикруялда, цо-цо министерстваби цолъизаризе руго. «Экономикаялдаги финансаздаги хадуб кьварараб низам букIине ккола – гьел кIиялго рахъазул жавабчилъи тIадкъазе ккола ДРялъул хIукуматалъул председателасда. Гьебмехалда гьел хъулухъазда тарал хIакимзаби берзукь рукIина. ЛъикIаб букIина, вице-премьерасулги министрасулги хъулухъ цого чияс тIубаниги – гьелъги цIикIкIинабила жавабчилъи. Республикаялъул бюджеталъул хайиралъулаб бутIа цIикIкIинабизе ккола. Дир пикруялда, вукIине ккола хIукуматалъул председателасул тIоцевесев заместитель – гьеб рахъалъ жавабчилъи тIалъула гьесда. Бюджеталъул хайиралъулаб бутIа цIикIкIани, гIемерисел социалиял масъалаби тIуразе бигьалъила», — ян бицана Артем Здуновас.
Владимир Васильевас рехсарал пикрабазул рахъккуна. Гьес ракIалдещвезабуна, Татарстаналдаги Здуновас гьедин гьабулеб букIараблъи ва «гьабсагIаталда гьениб щибаб къоялъ бакIарула налогазул цо млрд гъурушинги» абуна гьес.
Экономика
Тохтурзабазе харжал цIикIкIинаруна
Унтаразе дарабиги хIалтIухъабазе мухьги
заманалда кьезе ккола
ДРялъул Халкъияб Собраниялъул председатель Хизри ШихсагIидовги, парламенталъул вице-спикер Елена Ельниковаги, сахлъицIуниялъулги социалияб политикаялъулги комитеталъул председатель Висампаша ХангIалиевги, депутатал Лейла Керимовги ва Зумруд Бучаеваги щвана МахIачхъалаялъул №6 поликлиникаялде. Гьезда цадахъ вукIана ДРялъул сахлъицIуниялъул министрасул тIоцевесев заместитель Ферзуллагь ХIабибулаевги. Гьез халгьабуна поликлиникаялъул, гара-чIварана унтаралгунги медицинаялъул хIалтIухъабигунги.
ГьабсагIаталда рехсараб поликлиникаялда вуго 57 тохтурги 73 медсестраги. Цо сменаялда гьезухъе вачIуна 300-гIанасев унтарав. ХIалтIизабулеб буго тохтурасухъе иргаялда цIар хъвалеб электронияб къагIидаги.
Январалъул харжалъул аванс гурони кьечIо жеги тохтурзабазе. Ферзуллагь ХIабибулаевас абуна, 15 февралалда гьезие щвезе бугин цIикIкIинабураб харж: тохтурзабазе 40 азаргогIанасеб гъуруш ва медсестрабазеги санитаркабазеги – 20 азарго.
