30 апрелалдаса байбихьун 28 маялде щвезегIан анкьида жаниб кIиго нухалъ (арбагIалъги шаматалъги) Москваялдаса самолетал роржине руго Дагъистаналде туристазулги рачун. Гьедин бицана 13 апрелалда ТАССалда тIобитIараб пресс-конференциялда «Интурист» компаниялъул генералияв директор Виктор Тополкараевас.
Туризмалъул хIакъалъулъ бицунеб гьеб тадбиралда гIахьаллъана Россиялъул регионазул цо-цо губернаторалги, Дагъистаналъул бетIер Сергей Меликовги, Ростуризмалъул нухмалъулей Зарина Догузоваги, цогидалги.
«Интуристалъ» гьединал рейсал Дагъистаналде тIоцере гьаризехъин руго. Гьединго гьел ине руго Чачаналдегун, Ингушетиялде. Виктор Тополкараевас абуна рекIадухъ багьаги 1,5-2 нухалъ дагьаб букIине бугилан. СКФОялъул республикабазде гьабулеб, микьго къоялъ халатбахъунеб гIаммаб тур букIине буго гьеб.
Москваялдаса МахIачхъалаялде гьарулел гьел рейсазул кIудияб кIвар букIинин республикаялъеян абуна Сергей Меликовасги. Щайгурелъул риидал Москваялдаса МахIачхъалаялде роржине цIакъ захIмалъула белталги хиралъун. Гьединлъидал хIухьбахъизе рачIунел туристал гьел самолетазда рекIани, цогидаб мурадалъ (рокъоре щвезе яги хIалтIул ишалъ) республикаялде рачIунел гIадамазе бигьалъи лъугьинаан.
