FaceBook  tg  in  yt  rss

Горбода мусруги жемун

 

   Нахъеги авариял, нахъеги нухазда жаназаби. ХIинкъараб, рахIат хвараб ахIвал- хIал бугин республикаялъул нухаздаян абуни, гьеб ккезехъин буго щибниги абизе- го абичIин абураб гIадаб жо. Араб анкьалъул ва гьалъул байбихьуда цоялдаса цоял ракIгъанцIизабурал авариял ккана республикаялда.

    26 сентябралда Грозныялда ккараб ДТПялъул киназдаго рагIун батила. «ВАЗ- 21124» маркаялъул машина речIчIана «ГАЗельгун». ГьитIинаб машинаялда жа- ниб букIараб хъизан къадаралде щвана. Гьел рукIана нилъер республикаялдаса.

   Нахъисеб къоялъ, ай 27 сентябралда Мамедхъалаялда ва ДагъОгни шагьаралда гьоркьоб, КамАЗги «ВАЗ» ва «Мерседес» маркаялъул машинаги дандеречIчIун ункъо чи хвана, кIиго чи лъукъана, гьезул цоявги больницаялда къадаралде щвана.

  28 сентябралда МахIачхъалаялъул ГIахъушиясул цIаралда бугеб къотIноб, 17 сон барав гIолилас бачунеб ВАЗ-2107 маркаялъул автомобиль речIчIана рекламаялъул игIланал чIвалеб маххул хIоболъ. Социалиял сетазде рехун бачIараб гьелъул видеоролик бихьаралщиназ гьикъулеб букIана гьенив жанив чIагого чиго хутIанадаян абун. Нижехъе щварал баяназда рекъон, машина бачунев вукIарав гIолилавги, 22 сон барав гьесул гьалмагъги батIи-батIиял лъукъа- къотIиялгун больницаялде щвезаруна.

   ТIадехун абухъе, цIакъ гIемерал авариял кколел руго. Республикаялъул нухазда бугеб расги лъикIаб гуреб ахIвал-хIалалда тIасан жиндирго пикру гьадин загьир гьабуна хIалбихьи бугев шофер Шамил Шагьидовас.

   - «Хехаб кумекалъул» шоферлъун хIалтIулев вукIиндал, дида цогидаздасаги цIикIкIун рихьула республикаялда, мисалалъе, МахIачхъалаялда щибаб къоялъ гIадин кколел ругел авариял. Къасисеб дежурствоялда дун вугев цо-цо сордо букIуна гьитIинабниги кIудиябниги анцIго авария ккарабги. Щив гьелъие гIайибияв вугевин чIванкъотIараб суал, мисалалъе, дие кьолеб бугони, дица кидаго абула гIайибияв водитель вугин абун. Щайгурелъул лъимаца гIадал гъалатIал риччалел руго гIемерисел гIадамаз нухазда.

  Мисалалъе босилин, дун чанги ккана гьадинаб магIнаялъул авариязда тIаде: гIадатияб роцIараб къо, я гьури гуро я гIазу-цIад гуро, ракъварал нухал руго, амма лъимералъ гIадаб гъалатIги биччан, дандречIчIун батула кIиго машина. Гьединаб чаракъосараб хIал буго гьабсагIат нухазда. Чан нухалъ абуниги лъалеб гьечIо машина бачине, хасго гIолохъабазда. Дир эменги вукIана хIалбихьи бугев, гIумру рулалда нахъа арав чи. Гьесда цадахъ машинаялъуб ана дирги лъимерлъи. Гьес кидаго абулаан машина бачунесул кIиябго бер букIине кколин цебе балагьунилан, амма хьибилалдаги, гьединго нахъасанги лъугьунеб-толебги бихьизе кколин гьесдайилан. Дида, гьитIинав чиясда, бичIчIулароан гьелъул магIна. Рулалда нахъа хIалбихьи щведал, бичIчIана. КIиябго бер цебе балагьун бугониги, аскIосан, нахъасан, хьибилалдасан рачIунел машинабиги рихьизе ккола, пиридул хехлъиялда хIалтIизе ккола пикру, хIадурго вукIине ккола хехго хIукму къотIизе. Узухъда, щивниги чи цIунун гьечIо аварияздаса, кигIан хIалбихьи бугевги авариялде ккечIого хутIизе рес гьечIо, хасго гьаб заманалда. КигIан цIодорго машина бачаниги, цо гIабдал дуда речIчIани, хвана иш. Секундалда жаниб кколеб жо буго авария, щивго гьелдаса цIунун хутIуларо. Амма, кин бугониги, гIайибияв вуго шофер.

    20-27 сентябралъул къоязда республикаялда ккарал авариязул хIасилалда хвана 14 чи, лъукъа-къотIана 46-яв.

   Гъоркьиса республикаялъул нухазда хун вуго 316 чи.

   Исана араб ичIго моцIида жаниб авариялде ккун хварал гIадамазул гIаммаб къадар жеги загьир гьабун гьечIо республикаялъул ГИБДДялъ. ЦIакъ бокьилаан гьеб тарих, 2020 соналъул баяназде дандеккун, дагьаб батизе.

  Амма лъабго къоялда жаниб ккарал авариязухъ балагьун, бичIчIулеб буго лъагIалида жаниб гIемерав чиясе зарал ккараблъи.

 

 Ашахан ЮСУПОВ

Горбода мусруги жемун
Прочитано 207 раз

Оставить комментарий

Убедитесь, что Вы ввели всю требуемую информацию, в поля, помеченные звёздочкой (*). HTML код не допустим.

 

ХIакъикъаТ 

Республиканская общественно-политическая газета на аварском языке.

 

Исполняющий обязанности главного редактора:

Умахан Амирханович Умаханов

_____________________________

 

f1  in1  in1  yt1  rss1

_____________________________

 

Рейтинг@Mail.ru

Яндекс.Метрика

 

СМИ

Учредитель сетевого издания ГБУ РД "Редакция республиканской газеты "Истина".
Зарегистрирован Федеральной службой по надзору в сфере связи , информационных технологий и массовых коммуникаций .
vozrastСвидетельство о регистрации средства массовой информации Эл № ФС77-73996 от 19 октября 2018 года.

 

 

Фото

Настройка сайта

Цвет темы

Cyan Red Green Oranges Teal

Макет

Шир. Рам. Обрамл. Округл.
Изменение фонового рисунка
Вверх