5 декабралда Гъуниб районалъул Сугъралъ росдал хабалалъ вукъана КIудияб ВатIанияб рагъул гIахьалчи Муса Маркъулов. 1941 соналда рагъде арав гьесул хабар къотIун букIана. ГIагарлъиялда лъалеб букIинчIо гьесул къисмат. Гьеб лъана гIицIго 79 соналдасан. Краснодар краялъул Туапсе районалъул Шаумянское росдада аскIор ратана гьесул рукьбузул хутIелал.
Муса Маркъуловасе къадар щун буго Шаумянское росдада аскIоб бугеб 396-абилеб борхалъиялда. 1942 соналъ гьеб бакIалда унел рукIарал захIматал рагъазда, аскIоб кьвагьараб минаялъул хIасилалда чIван вуго гьевги гьесда цадахъ вукIарав чанго чиги. Гьезул рукьбузда тIаде ккун руго «Кубаньпоиск» абураб рагъда тIагIарал солдатал ралагьулеб отрядазул ассоциациялъул хIаракатчагIи.
Муса Маркъуловасул жаназаялъул хутIелал гьел рукIинги чIезабизе кIун буго, гьенир аскIорго ратарал гьесул алатазул кумекалдалъун. Солдатасул флягаги, каска-тIагъурги, рахханги, цадахъ босулеб хьагги ратун руго гьениб. Гьеб хьагида тIад бикIун батараб Маркъулов абураб фамилиялъул кумекалдалъун кIун буго гьев Дагъистаналдаса вукIин чIезабизе.
«Кубаньпоиск» къокъаялъул ассоциациялъ бухьен гьабуна Гъуниб районалъул Сугъралъа гьесул гIага-божаразулгун. КIудияв инсул вацасул хутIелал гIагараб ракьалде росизе, 2 декабралда Краснодаралде ун вукIана Ризван Маркъулов. Гьев ккола Муса Маркъуловасул вац Ризванил васасул вас.
1941 соналда рагъде унаго гьесул документазда хъван буго гьев ЧIарада районалъул рагъулаб комиссариаталъ фронталде ахIанилан. Гьеб мекъаб баян сабаблъун, гьесул цониги кагъатги бачIун гьечIо рокъобе.
«Мекъаб адресалда рекъон унел рукIиналъ нухдаго тIагIун рукIине ккола гьесул кагътал. Краснодаралъул «Кубаньпоиск» къокъаялъулаз гьесул хутIелал ратун хадубги, хьагида бикIун батараб цIаралда рекъон, МухIамад Маркъулов абун хъван батана гьесул хIакъалъулъ. ХIакъикъаталдайин абуни гьев ккола Муса», — ян бицана Р. Маркъуловас.
Гъуниб районалъул Сугъралъа ВатIанияб рагъде ун вуго ункъо вац: Ризван, Муса, ГIумар ва Расул. Муса кколаан кIиабилев. Гьезул кIигоял — Мусаги ГIумарги рагъда чIвана, цояв вац Расул, доб заманалда дизертирлъи гьабулев ватун Гъунив кквезе щварав такъсирчиги вачун витIулаго, дизертирасул квердасан хола. Рагъдаса чIаго вуссана Ризван. Инсул тIолабго гIумру анин вацасул къисмат цIехолагоян бицана нижее гьесул вас МухIамадица.
«Эмен, л ъабго н ухалда л ъукъун хадув вуссана рагъдаса. Муса кколаан гьесдаса хадусев, гьесул кагъатцин бачIинчIо рагъдаса. Хадусев вац ГIумарил кIиго кагъатниги бачIун букIана. Амма Мусал къисматалъул щибго лъалеб жо букIинчIо. Инсул анищ букIана гьев вукъараб бакIгIаги лъазаби, хутIичIо мунагьал чурад чIаго гьесул хабар лъазегIан. Инсуда аскIов вукъана нижеца гьев.
Краснодаралдаса ругьел бачIиндал, дица абулеб букIана гьенивго тейин гьев, ай ватарабго бакIалдайилан. Амма гIагарлъи разилъичIо ва росулъе вукъизе восана», — ян бицана М. Маркъуловас.
Рагъде инегIан росулъ цIулал устарлъи гьабулеб букIун буго Мусаца. Жакъаги нахъе руго доб мехалъ гьес гьарун рукIана нуцIби. Жеги хъизан гьабичIев чи ун вуго гьев фронталдеги.
Гьаб кIиабилеб хIужа ккола Гъуниб районалдаса КIудияб ВатIанияб рагъда тIагIарал солдатазул хутIелал ватIаналде тIад руссинарураб. Анкьго соналъ цебеги, 2013 соналъул апрелалда, СалтIа росулъ рукъана Къураев Сайпудинилги хутIелал. Рагъ байбихьараб 1941 соналъул риидал армиялде арав гьевги рокъове вуссинчIо. 1943 соналъ Сайпудинил эбелалъухъе кагъат бачIуна дур вас араб бакI лъачIого тIагIанин абун. 1956 соналдаса нахъе гьесул гIагарлъиялъ, Оборонаялъул министерствоялъул цIаралда кагътал ритIулел рукIана Сайпудинил къисмат цIехон. 2012 соналъул октябралда гьезухъе кагъат бачIана, Къураев Сайпудин Украинаялъул Одесса шагьаралда аскIов хандакъалъув ватаниланги абун. Щивав солдатасухъ букIунеб эбанитовая капсулаялда жаниб лъураб кагътида тIад жиндирго росдалги, эбелалъулги ва жиндиргоги хIакъалъулъ киналго баянал мухIканго хъван рати сабаблъун ккун буго Сайпудинил жаназадул хутIелал ратиялъе.