Пачалихъалъ бесдалазе рукъзал росизе кьураб гIарац, гьелги росичIого, МахIачхъалаялдаса, Избербашалдаса, Хасавюрталдаса ва Хасавюрт районалдаса нахъбуссун республикаялъул бюджеталдего бачIине рес буго.
Гьедин бицана гьал къоязда хIукуматалда тIобитIараб данделъиялда ДРялъул лъай кьеялъулгун гIелмуялъул министрасул ишал тIуралев ЯхIя Бучаевас.
Гьеб идараялъул сайталда хъвавухъе, республикаялда буго жанир чIезе рукъ къваригIараб 3223 бесдал лъимер. Гьезда гьоркьоса 1011 лъимер ккола эбел-инсул цонигиял гьечIеб. Гьел киназего рукъзал росизе хIажалъулеб буго щуго миллиардгIанасеб гъурущ.
Я. Бучаевасул рагIабазда рекъон, исана гьезие рукъзал росизе республикаялъул бюджеталда бихьизабун букIана 588 млн гъурущ (гьелда гьоркьоса 138 млн ккола федералияб бюджеталдаса биччараб).
Амма гьабсагIаталда бесдалазул гIицIго 15 проценталъ гурони рукъзал росизе рес гьечIо, ай гьеб ккола 484 лъимер.
Байбихьуда бицен гьабураб гIарац бюджеталдего нахъе щай буссинабизе кколебали гьадин бицана жамгIияй хIаракатчIужу, бесдал лъималазе рукъзал росизелъун хIукуматалъ гIуцIараб комиссиялъул вакил Раисат ГIусмановалъ:
— Сергей Меликов гьанжего-гьанже Дагъистаналде вачIиндал, дица борхун букIана гьеб суал. Гьеб мехалда гьес балагьана 630 бесдал лъимералъе рукъ босизе хIажатаб гIарац. Амма хадубккун, аукционалги цогидабги лъазабун, гьел рукъзал росиялде иш ккедал, загьирлъана бесдалазе кьолеб гIарацги гIемертIалаял минаби ралез чIезарурал нормативалги данде кколел гьечIолъи. Пачалихъалъ бесдалазе рихьизарурал нормативазда рекъон ралел минаби гьечIо гьанже. Законалъ бихьизабухъе, квадратияб 18 метр ккола гьеб.
ТIадежоялъе, пандемиялда дандеккун хиралъана сундухъго багьабиги. Масала, бесдалазе пачалихъалъ кьолеб 1 млн 400 азарго гъурщиде босизе бегьулеб букIараб рукъалъул багьа гьанже 200-300 азарго гъурщица хиралъун буго.
Гьединлъидал гьеб суал бараб буго гIемертIалаял минабазул бетIергьабаздаги. Гъоркьисала, масала, гьединав цо чияс киридахъ тIадеги квадратураги кьун, ункъо рукъалъул секция щвана бесдалав инвалид вугеб цо хъизамалъе. Жеги рукIана гьединал мисалал.
Дица добго данделъиялда абун букIана бесдал лъималазе хIажатал нормативазда рекъон цохIо подъездалданиги рукъзал райин абун щай застройщиказда цебе суал лъоларебин абун.
Гьаниб суал бачIунеб буго хас гьабун бесдал лъималаз гурони жаниб гIумру гьабулареб мина базе бегьулародай абун. Гьеб мехалда бихьизабизе бегьилаан гьениб жаниб щивасе пачалихъалъ чIезабураб квадратураги. Амма Раисат ГIусмановалъ рикIкIунеб буго гьединаб жо гьабизе бегьуларин. Щайин абуни, гIадатиял хъизамаздаса батIа кIанцIун гьел бесдалал чIезарулеб гIадаб жо ккезе бугила гьелъул. ГIадатиял хъизамал мадугьалихъ ругони, бокьараб ишалъулъ гьездаса кумекниги щвезе рес бугила бесдалазе.
З. ХIажиева
