Рукъзал щвезе иргаялда чIарал ветеранал

рази гьаруна гIарацги кьун

 

Афгъанистаналъул рагъул ветераназе мина-рукъалъул суал роцIцIинабизелъун субсидиялъул гIарац кьезе байбихьана гьал къозда. Гьезул щивасе щвезе буго цо миллионгун 171 296 гъурущ. Гьаб сон лъугIилалде гьеб гIарац 190 ветеранасе кьун рагIалде бахъинабизе бугин абуна республикаялъул ЗахIматалъулгун социалияб цебетIеялъул министерствоялъ.

Федералияб бюджеталдаса гьелъие биччан буго 223 миллион гъурущ. Министерствоялъ бицухъе, рукъ босизе гIарац щварал афгъаналъулазул къадар соналдаса соналде цIикIкIунеб буго. Мисалалъе, 2017 соналда гьеб гIарац щун буго 61 чиясе, 2018 соналда – 29, 2019 соналда – 62 ва гъоркьиса — 85 чиясе.

2005 соналдаса нахъе иргаялда чIун ругел ветераназе субсидиялъул гIарац кIиго-лъабго соналда жаниб тIубанго кьун рагIалде бахъинабизе ракIалда буго ЗахIматалъулгун социалияб цебетIеялъул министерствоялда.