Миллияб политикаялъул масъалаби
ДРялъул хIукуматалъул председателас тIобитIараб данделъиялда бицана, пачалихъияб миллияб политика гIумруялде бахъинабулаго гьарулел ругел хIалтIабазул хIакъалъулъ.
Гьеб рахъалъ гьабулеб хIалтIул хIакъалъулъ бицана ДРялъул миллияб политикаялъулги диниял ишазулги министр Татьяна Гамалейица. Гьелъул баяназда рекъон, 2013-2014 соназда министерствоялъ муниципалитетазулгун къотIаби гьаруна миллиял бухьенал щулалъизариялъул хIакъалъулъ. Гьезда рекъон, 29 муниципалияб гIуцIиялдаги шагьаразул округаздаги хIадурун руго муниципалиял программаби ва 23-ялда – миллатазда гьоркьосеб рекъел цIуниялъул хIакъалъулъ планал.
Гамалейил баяназул хIасил гьабулаго, Артем Здуновас абуна, цIикIкIараб кIвар буссинабизе кколин хIалуцарал лъугьа-бахъинал кколел бакIаздеян.
Миллатазул гьудуллъи щулалъизабиялъул мурадалда гIуцIун рукIарал тадбиразул хIакъалъулъ бицана ДРялъул информатизациялъулгун бухьеналъул ва коммуникациязул министр Сергей Снегиревасги ДРялъул культураялъул министр Зарема Бутаевалъги.
Данделъиялда Пачалихъиял закупкабазул комитеталъул председателасул ишал тIуралев Жапар ХIажибеговас бицана пачалихъиял закупкабазул рахъалъ гьабураб хIалтIулги. Гьес абуна, гьеб хIалтIи гьабулаго, республикаялъе тIокIлъизабунин 795,4 млн гъуруш.
